பட்டினப்பாக்கம் லூப் சாலையில் நவீன மீன் அங்காடி

சென்னை, பட்டினப்பாக்கம் லூப் சாலையில் ரூ.9.97 கோடி மதிப்பீட்டில் நவீன மீன் அங்காடி அமைக்க அரசாணை வெளியிடப்பட்டுள்ளது.

பெருநகர சென்னை மாநகராட்சிக்குள்பட்ட தேனாம்பேட்டை மண்டலம், பட்டினப்பாக்கம் கடற்கரை ஒட்டியுள்ள லூப் சாலையின் இருபுறங்களிலும் மீன் அங்காடிகள் செயல்பட்டு வருகின்றன. இதனால் இப்பகுதியில் குறிப்பாக வார இறுதி

நாள்களில் போக்குவரத்து நெரிசல் ஏற்படுகிறது.

அதனைச் சமாளிக்கும் வகையிலும், மீனவா்களும் பொதுமக்களும் பயன்பெறும் வகையிலும், சென்னை பட்டினப்பாக்கம் கடற்கரை லூப் சாலையில் நவீன மீன் அங்காடி அமைக்கப்படும் என நகராட்சி நிா்வாகத்துறை அமைச்சா் கே.என். நேரு கடந்த சட்டப்பேரவை மானிய கோரிக்கை விவாதத்தின் போது அறிவித்தாா்.

இதன் தொடா்ச்சியாக ரூ.9.97 கோடி மதிப்பீட்டில் அனைத்து வசதிகளுடன் கூடிய நவீன மீன் அங்காடி அமைக்க அரசின்

நிா்வாக அனுமதி கோரி விரிவான திட்ட அறிக்கை சமா்ப்பிக்கப்பட்டது.

அதனடிப்படையில், பட்டினப்பாக்கம் கடற்கரையை ஒட்டியுள்ள லூப் சாலையில் நவீன மீன் அங்காடி அமைக்க நகராட்சி நிா்வாகம் மற்றும் குடிநீா் வழங்கல் துறையின் சாா்பில் நிா்வாக அனுமதியும், உள்கட்டமைப்பு மற்றும் வசதிகள் நிதியின் கீழ் ரூ.9.97 கோடி நிதி ஒதுக்கீடு செய்தும் அரசாணை வெளியிடப்பட்டுள்ளது.

மேலும், ஒப்பந்தங்கள் கோரப்பட்டு பணிகள் விரைந்து தொடங்கப்படும் என மாநகராட்சி ஆணையா் ககன் தீப் சிங் பேடி தெரிவித்தாா். இது தொடா்பாக அவா் கூறுகையில், ‘இந்த நவீன மீன் அங்காடியில் சுற்றுச் சுவருடன் 366 மீன் அங்காடிகள், மீனவா்கள் மற்றும் பொது மக்களுக்கான குடிநீா், கழிவறை வசதிகள், மீன்களை சுத்தம் செய்ய தனியாக 2 பகுதிகள், இந்த அங்காடி வளாகத்திலிருந்து வெளியேற்றப்படும் கழிவுநீரை சுத்திகரிப்பு செய்யப்பட்ட பிறகே வெளியேற்றும் வகையில் 40 கி.லி கொள்ளளவு கொண்ட கழிவு நீா் சுத்திகரிப்பு நிலையம், 60 இருசக்கர வாகனங்கள், 110 நான்கு சக்கர வாகனங்கள் நிறுத்தும் வகையில் வாகன நிறுத்தம், மழைநீா் சேகரிப்பு கட்டமைப்புகள் மற்றும் உயா் கோபுர மின் விளக்குகளும் ஏற்படுத்தப்பட உள்ளன’ என்றாா்.