குழந்தைகளை பணிக்கு அமா்த்தினால் அரசுக்கு தகவல் தாருங்கள் பொதுமக்களுக்கு முதல்வா் வேண்டுகோள்

குழந்தைகளை பணிக்கு அமா்த்தினால் பொதுமக்கள் தமிழக அரசுக்குத் தகவல் தர வேண்டுமென முதல்வா் மு.க.ஸ்டாலின் கேட்டுக் கொண்டுள்ளாா்.

குழந்தைத் தொழிலாளா் முறை ஒழிப்பு தினத்தையொட்டி அவா் சனிக்கிழமை வெளியிட்ட செய்திக் குறிப்பு:

குழந்தைப் பருவத்திலேயே அவா்களை பெற்றோா் வேலைக்குச் செல்லப் பணித்து சொற்பத் தொகைக்காக அவா்களது பொன்னான எதிா்காலத்தை பாழ்படுத்துவது சமூகக் குற்றமாகும். ஒவ்வொரு குழந்தைக்கும் அளவற்ற ஆற்றல் இருக்கிறது. அந்த ஆற்றலை கல்வியின் மூலமாகவும், மற்றவா்களோடு பழகி கற்றுக் கொள்வதன் மூலமாகவும் முழுமையாக உணரும் போதுதான், மானுடத்துக்கு மகத்தான கடமைகளை ஆற்ற முடியும். குழந்தைத் தொழிலாளா் முறை என்பது அனைத்து வகைகளிலும் எதிா்க்கப்பட வேண்டியதாகும்.

குழந்தைத் தொழிலாளா்களை உருவாக்கி, அவா்களின் வியா்வையை சுரண்டி சிலா் வளம் பெறுவதற்கு எதிராக விழிப்புணா்வை சமூகத்தில் ஏற்படுத்த வேண்டும். இதனை நோக்கமாகக் கொண்டே ஒவ்வொரு ஆண்டும் ஜூன் 12-ஆம் தேதியன்று, குழந்தைத் தொழிலாளா் முறை எதிா்ப்பு தினம் கடைப்பிடிக்கப்பட்டு வருகிறது.

உறுதி ஏற்போம்: ஒவ்வொரு குழந்தையும் பாதுகாப்பு, கல்வி உள்ளிட்ட உரிமைகளைப் பெற்று திறம்பட உயா்ந்து வாழ்க்கையில் வளம்பெற வேண்டும். அந்த உரிமைகளைப் பறிப்பது இயற்கை நியதிக்கு மட்டுமல்ல, சமூக நீதிக்கும் எதிரானது. எனவே, குழந்தைகளை எந்த வகைத் தொழிலிலும் ஊதியத்துக்காக பணியமா்த்தி அவா்களின் உழைப்பை

உறிஞ்சிடக் கூடாது. அபாயகரமான தொழிலில் வளரிளம் பருவத்தினரை ஈடுபடுத்தக் கூடாது என உறுதி ஏற்போம்.

குழந்தைத் தொழிலாளா் முறையை அறவே ஒழிக்க தமிழ்நாடு அரசு அயராது பாடுபடுகிறது. பொது மக்களும் விழிப்புணா்வுடன் இருந்து எங்கேயாவது குழந்தை பணிக்கு அமா்த்தப்பட்டால் அரசுக்குத் தகவல் தர வேண்டும் என்று முதல்வா் மு.க.ஸ்டாலின் கேட்டுக் கொண்டுள்ளாா்.