காட்பாடி அருகே முதியவர் மீது மோதிய கார்! (சிசிடிவி காட்சி)

காட்பாடி அருகே அதிவேகத்தில் வந்த கார் முதியவர் ஒருவரை இடித்துச் சென்ற சிசிடிவி காட்சி வெளியாகியுள்ளது.

வேலூர் மாவட்டம் காட்பாடி அடுத்த கீழ் வடுகன்குட்டை பகுதியில் உள்ள தனியார் மண்டபத்தின் எதிரில் நேற்று(ஞாயிற்றுக்கிழமை) மாலை சுமார் 5 மணியளவில் மது அருந்திய முதியவர் சாலையின் இருபுறமும் கவனிக்காமல் சைக்கிளில் சாலையைக் கடந்தார். அப்போது குடியாத்தத்தில் இருந்து காட்பாடி நோக்கி அதிவேகமாக வந்த கார் முதியவர் மீது மோதியது. 

அதன் பின்பு சற்று நேரத்தில் அங்கிருந்து எழுந்த முதியவர் தன்னுடைய சைக்கிளை எடுத்துக்கொண்டு தன்னுடைய சொந்த ஊரான வெங்கடேசபுரத்தை நோக்கி பயணித்தார்.

சுமார் 20 நிமிடமாக அங்கிருந்த கார் ஓட்டுநர், முதியவர் எழுந்து சென்ற பின்பு தானும் தன்னுடைய காரை எடுத்துக்கொண்டு அங்கிருந்து சென்றுவிட்டார்.

ஆனால் இந்த விபத்து குறித்து இதுவரை காட்பாடி காவல்நிலையத்தில் யாரும் புகார் அளிக்கவில்லை.

கார் மோதிய விபத்தில் முதியவர் உயிர் பிழைத்து எழுந்து சென்றது அப்பகுதியில் ஆச்சரியத்தை ஏற்படுத்தியுள்ளது.