ஐஎஸ்ஐஎஸ்ஸுடன் தொடா்பில் இருந்ததாக கைதானவரின் ஜாமீன் மனு தள்ளுபடி

தடை செய்யப்பட்ட ஐஎஸ்ஐஎஸ் அமைப்புடன் தொடா்பில் இருந்ததாக கைது செய்யப்பட்ட ஈரோட்டைச் சோ்ந்தவருக்கு ஜாமீன் வழங்க மறுத்த சென்னை உயா் நீதிமன்றம், மனுவை தள்ளுபடி செய்து உத்தரவிட்டது.

தடை செய்யப்பட்ட ஐஎஸ்ஐஎஸ் அமைப்புடன் தொடா்பு வைத்திருந்ததாக ஈரோட்டைச் சோ்ந்த ஆசிப் முஸ்தகீன் என்பவரை போலீஸாா், கடந்த ஜூலை 26-ஆம் தேதி கைது செய்தனா். அவரிடமிருந்து பறிமுதல் செய்யப்பட்ட கைப்பேசியில் இருந்து அவா், அரபி மொழியில் ஐஎஸ்ஐஎஸ் அமைப்பை சோ்ந்தவா்களுடன் நடத்திய உரையாடல்கள் கண்டுபிடிக்கப்பட்டன.

இதையடுத்து அவருக்கு எதிராக சட்டவிரோத நடவடிக்கைகள் தடுப்புச் சட்டம் உள்ளிட்ட சட்டப் பிரிவுகளின் கீழ் வழக்குப் பதிவு செய்யப்பட்டது. இந்த வழக்கில் ஜாமீன் கோரி ஆசிப் முஸ்தகீன் தாக்கல் செய்த மனுவை, ஈரோடு முதன்மை அமா்வு நீதிமன்றம் தள்ளுபடி செய்தது. இந்த உத்தரவை எதிா்த்து முஸ்தகீன் சென்னை உயா் நீதிமன்றத்தில் மனு தாக்கல் செய்திருந்தாா். அதில், கடும் நிபந்தனைகளை விதித்து ஜாமீன் வழங்க வேண்டும் என கோரியிருந்தாா்.

இந்த மனு நீதிபதிகள் பி.என்.பிரகாஷ், டீக்காராமன் அமா்வில் விசாரணைக்கு வந்தது. அப்போது மனுதாரா் தரப்பில், ‘கைது குறித்த தகவலில் பறிமுதல் செய்யப்பட்ட கைப்பேசி, பென் டிரைவ், டைரி குறித்து எதுவும் குறிப்பிடப்படவில்லை. கைப்பேசியில் இடம்பெற்றிருந்த அரபி மொழியில் நடந்த உரையாடல்களின் கூகுள் மொழிபெயா்ப்பு தவறானது. மனுதாரா் மீது பொய் வழக்குப் பதிவு செய்யப்பட்டுள்ளது’ என்று வாதிடப்பட்டது.

இந்த வாதங்களை ஏற்க மறுத்த நீதிபதிகள், மனுதாரா் கைது செய்யப்பட்டு, ஒப்புதல் வாக்குமூலம் பெறப்பட்ட பிறகே பொருள்கள் பறிமுதல் செய்யப்பட்டுள்ளன. எனவே, அவை குறித்து கைது தகவலில் குறிப்பிடவில்லை என்ற வாதத்தை ஏற்க முடியாது. வழக்கின் புலன் விசாரணை ஆரம்ப கட்டத்தில் உள்ளதால் தற்போதைய நிலையில் ஜாமீன் வழங்க முடியாது எனக் கூறி, மனுவை தள்ளுபடி செய்து உத்தரவிட்டனா்.