Enable Javscript for better performance
கோவை கார் வெடிவிபத்து: என்ஐஏ விசாரிக்க தமிழக அரசு பரிந்துரை- Dinamani

உடனுக்கு உடன் செய்திகள்

    கோவை கார் வெடிவிபத்து: என்ஐஏ விசாரிக்க தமிழக அரசு பரிந்துரை

    By DIN  |   Published On : 26th October 2022 02:44 PM  |   Last Updated : 26th October 2022 05:51 PM  |  அ+அ அ-  |  

    cm_meeting

    என்ஐஏ விசாரணைக்கு பரிந்துரை செய்திருப்பதாக தமிழக முதல்வர் மு.க. ஸ்டாலின் அறிவித்துள்ளார்.


    சென்னை: கோவை, உக்கடம் பகுதியில் நிகழ்ந்த கார் சிலிண்டர் வெடிப்பு தொடர்பான வழக்கின் விசாரணையை தேசிய புலனாய்வு அமைப்புக்கு மாற்றிட பரிந்துரை மற்றும் கோவையில் பாதுகாப்பினைத் தொடர்ந்து உறுதி செய்திட தமிழக முதல்வர் மு.க. ஸ்டாலின் உத்தரவிட்டுள்ளார்.

    கோவை, உக்கடம் பகுதியில் 23-10-2022 அன்று நிகழ்ந்த கார் சிலிண்டர் வெடிப்பு தொடர்பாக மேற்கொள்ளப்பட்டு வரும் விசாரணை குறித்தும், பொதுவான சட்டம்- ஒழுங்கு நிலவரம் குறித்தும் தமிழக முதல்வர் ஸ்டாலின் தலைமையில் இன்று (26-10-2022) தலைமைச் செயலகத்தில் விரிவான ஆய்வுக் கூட்டம் நடைபெற்றது.

    இதையும் படிக்க | ''உடல் சிலிர்த்தது'': 'காந்தாரா' படத்துக்கு நடிகர் ரஜினிகாந்த் விமர்சனம்

    இந்த ஆய்வுக் கூட்டத்தில், மேற்படி கார் சிலிண்டர் வெடிப்பு சம்பவம் தொடர்பாக காவல் துறையினரால் மேற்கொள்ளப்பட்டு வரும் விசாரணை குறித்தும், கோவை மாவட்டத்தில் செய்யப்பட்டுள்ள முன்னெச்சரிக்கை பாதுகாப்பு ஏற்பாடுகள் குறித்தும் விவாதிக்கப்பட்டது.

    இந்தச் சம்பவம் தொடர்பான வழக்கு விசாரணையின் தற்போதைய நிலை குறித்தும், கோவை மாவட்டத்தில் பாதுகாப்பினை மேலும் உறுதி செய்திடவும் தமிழக முதல்வர் காவல் துறை அதிகாரிகளுக்கு உத்தரவிட்டார்.

    இதுபோன்ற சம்பவங்களின் விசாரணையில், மாநிலம் தாண்டிய பரிணாமங்களும், பன்னாட்டுத் தொடர்புகளும் இருக்க வாய்ப்புள்ளதால், இவ்வழக்கின் விசாரணையை தேசிய புலனாய்வு அமைப்பிற்கு மாற்றிட மத்திய அரசுக்கு உரிய பரிந்துரைகளை செய்திட இக்கூட்டத்தில் முடிவு செய்யப்பட்டது; 

    மேலும்,
    கோவை மாநகரின் பாதுகாப்பினை மேலும் வலுப்படுத்திட கரும்புக் கடை, சுந்தராபுரம், கவுண்டம்பாளையம் ஆகிய மூன்று பகுதிகளில் புதிய காவல் நிலையங்களை உடனடியாக அமைத்திடவும்;

    மாநிலத்தில் இதுபோன்ற நிகழ்வுகள், சம்பவங்கள் வருங்காலங்களில் நடைபெறாமல் தடுத்திடும் வகையில், காவல் துறையில் ஒரு சிறப்புப் படையை உருவாக்கிடவும்;

    கோவை உட்பட தமிழ்நாட்டின் முக்கிய நகரங்களிலும், மக்கள் அதிகம் வசிக்கக்கூடிய முக்கிய பகுதிகளிலும், கூடுதல் நவீன கண்காணிப்புக் கேமராக்களை விரைவில் பொருத்துவதற்குத் தேவையான நடவடிக்கைகளை மேற்கொள்ளவும்;

    மாநிலத்தின் உளவுப் பிரிவில் கூடுதல் காவல்துறை அலுவலர்களை நியமனம் செய்திடவும்;

    இதுபோன்ற சட்டவிரோதச் செயல்களில் ஈடுபடுவோரைப் பற்றியும், அவர்களோடு தொடர்பு வைத்திருப்பவர்களைப் பற்றியும் நுண்ணிய தகவல்களை அளிப்போருக்கு தக்க பாதுகாப்பினை வழங்கிடவும், அவர்களை ஊக்குவித்திடவும் தமிழக முதல்வர்  மு.க. ஸ்டாலின் உத்தரவிட்டார்.

    இந்தக் கூட்டத்தில், தலைமைச் செயலாளர் முனைவர் வெ. இறையன்பு, உள்துறை கூடுதல் தலைமைச் செயலாளர் பணீந்திர ரெட்டி, காவல் துறை தலைமை இயக்குநர் முனைவர் செ. சைலேந்திர பாபு, காவல் துறை கூடுதல் இயக்குநர் (நுண்ணறிவு) டேவிட்சன் தேவாசிர்வாதம் மற்றும் காவல் துறை உயர் அலுவலர்கள் கலந்து கொண்டனர்.

    டிஜிபியுடன் முதல்வர் ஆலோசனை

    முன்னதாக, கோவையில் நடந்த கார் வெடி விபத்துச் சம்பவம் தொடர்பாக, காவல்துறை டிஜிபியுடன் முதல்வர் மு.க. ஸ்டாலின் ஆலோசனை நடத்தினார். இந்த ஆலோசனையின் நிறைவாக, கோவை சம்பவத்தை என்ஐஏ விசாரணைக்கு பரிந்துரைத்து முதல்வர் உத்தரவிட்டுள்ளார்.

    தலைமைச் செயலகத்தில் முதல்வரின் அறையில், கோயம்புத்தூர் சம்பவத்தைத் தொடர்ந்து மாநிலத்தின் சட்டம் ஒழுங்கு நிலை குறித்து இன்று நடைபெற்ற ஆலோசனைக் கூட்டத்தில், தலைமைச் செயலாளர் முனைவர் வெ. இறையன்பு, உள்துறை கூடுதல் தலைமைச் செயலாளர் க. பணீந்திர ரெட்டி, காவல்துறை தலைமை இயக்குநர் முனைவர் செ. சைலேந்திர பாபு, காவல்துறை மற்றும் அரசு உயர் அலுவலர்களும் கலந்து கொண்டனர்.

    சுமார் 20 நிமிடங்கள் நடைபெற்ற இந்த ஆலோசனைக் கூட்டத்துக்குப் பின், முக்கிய முடிவுகள் எடுக்கப்பட்டு அது தொடர்பான அறிவிப்புகள் வெளியாகலாம் என்ற எதிர்பார்ப்பு எழுந்த நிலையில், என்ஐஏ விசாரணைக்கு பரிந்துரைக்கப்பட்டுள்ளது.

    கோவையில் என்ஐஏ அதிகாரிகள் முகாமிட்டிருந்த நிலையில், அடுத்தகட்ட நடவடிக்கைகள் குறித்து முதல்வர் ஸ்டாலின் ஆலோசனை நடத்தி, என்ஐஏ விசாரணைக்கு உத்தரவிட்டிருப்பதால், உடனடியாக இந்த வழக்கை என்ஐஏ அதிகாரிகள் விசாரணைக்கு ஏற்றுக்கொள்வார்கள் என்று எதிர்பார்க்கப்படுகிறது.

    கோவையில் கார் வெடிவிபத்தில் 5 பேர் கைது
    கோவையில் காா் வெடிவிபத்தில் இறந்தவருடன் தொடா்பில் இருந்ததாக 5 பேரை யுஏபிஏ சட்டத்தின் (சட்டவிரோத நடவடிக்கைகள் தடுப்புச் சட்டம்) கீழ் கைது செய்துள்ளதாக மாநகர காவல் ஆணையா் வி.பாலகிருஷ்ணன் தெரிவித்திருந்தார்.

    இது தொடா்பாக அவா் செய்தியாளா்களிடம் கூறியதாவது: கோவை உக்கடம், கோட்டைமேடு அருள்மிகு சங்கமேஸ்வரா் கோயில் முன்பு காா் ஒன்றில் கடந்த ஞாயிற்றுக்கிழமை (அக்டோபா் 23) அதிகாலை 4 மணி அளவில் வெடிவிபத்து நேரிட்டது. காரில் இருந்த 2 சிலிண்டா்களில் ஒன்றும் 3 பிளாஸ்டிக் டிரம்களில் இருந்த வெடிபொருள்களும் வெடித்ததில் காா் சுக்குநூறானது. இதில் காரை ஓட்டி வந்த ஜமேஷா முபீன் (25) என்பவா் சம்பவ இடத்திலேயே உடல் கருகி உயிரிழந்தாா். இது தொடா்பாக தனிப்படைகள் அமைக்கப்பட்டு விசாரணை நடத்தப்பட்டது. இறந்த நபா் யாா் என்பது 12 மணி நேரத்துக்குள் கண்டுபிடிக்கப்பட்டது. விபத்துக்குள்ளான காா் 10 பேரிடம் கைமாறியிருந்த நிலையில் அவா்கள் அனைவரிடமும் விசாரணை நடத்தப்பட்டுள்ளது.

    உதவி ஆணையா் தலைமையில் 6 காவல் ஆய்வாளா்கள் அடங்கிய குழு எனது மேற்பாா்வையில் விசாரணை நடத்தியது. சம்பவ இடத்தை டி.ஜி.பி. சி. சைலேந்திரபாபு, ஏ.டி.ஜி.பி. பி.செந்தாமரைக்கண்ணன் ஆகியோா் நேரில் பாா்வையிட்டு ஆய்வு செய்தனா். உயிரிழந்த ஜமேஷா முபீனுடன் தொடா்பில் இருந்த உக்கடம் பகுதியைச் சோ்ந்த முகமது தல்கா (25), முகமது அசாருதீன் (23), ஜி.எம்.நகா் பகுதியைச் சோ்ந்த முகமது ரியாஸ் (27), ஃபிரோஸ் இஸ்மாயில் (27), முகமது நவாஸ் இஸ்மாயில் (26) ஆகியோா் கைது செய்யப்பட்டுள்ளனா்.

    இவா்கள் மீது கூட்டுச் சதி, இரு பிரிவினரிடையே விரோதத்தை ஏற்படுத்துதல் உள்ளிட்ட பிரிவுகளின் கீழ் வழக்குப் பதிவு செய்யப்பட்டிருந்த நிலையில் தற்போது சட்டவிரோத நடவடிக்கைகள் தடுப்புச் சட்டத்தின் கீழும் வழக்குப் பதிவு செய்யப்பட்டுள்ளது.

    இந்தச் சம்பவம் தொடா்பாக 20க்கும் மேற்பட்ட நபரிடம் விசாரணை நடத்தப்பட்டுள்ளது. தற்போது கைது செய்யப்பட்டுள்ள 5 பேரில் சிலா் அடிக்கடி கேரளம் சென்று வந்திருப்பது தெரியவந்துள்ளது. இவா்கள் எதற்காக கேரளம் சென்றனா் என்பது குறித்து விசாரித்து வருகிறோம்.

    உயிரிழந்த ஜமேஷா முபீன் வீட்டின் அருகே கைப்பற்றப்பட்ட கண்காணிப்பு கேமரா பதிவு காட்சிகளில் ஜமேஷா முபீனின் வீட்டில் இருந்து 2 சிலிண்டா்கள், 3 சிறிய அளவிலான டிரம்கள் எடுத்துச் செல்லப்படும் காட்சிகள் பதிவாகியுள்ளன. கண்காணிப்பு கேமரா பதிவில் இடம்பெற்றிருந்த முகமது ரியாஸ், முகமது நவாஸ் இஸ்மாயில், ஃபிரோஸ் இஸ்மாயில் ஆகியோா் வெடிபொருள்களை தெரிந்தே எடுத்துச் சென்றனா் என்பதும் தெரியவந்துள்ளது. மேலும், கைது செய்யப்பட்டுள்ள நபா்களில் ஒருவரான முகமது தல்கா, அல் உம்மா அமைப்பைச் சோ்ந்த பாஷாவின் உறவினா் என்பதும் தெரியவந்துள்ளது.

    ஜமேஷா முபீனின் வீட்டில் இருந்து 75 கிலோ அளவிலான பொட்டாசியம் நைட்ரேட், சாா்கோல், அலுமினியம் என வெடிபொருள் தயாரிப்பதற்கான மூலப் பொருள்கள் பறிமுதல் செய்யப்பட்டுள்ளன என்றாா்.
     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp