தமிழகத்தில் அங்கீகரிக்கப்பட்ட கட்சிகள் எவை? தோ்தல் துறை உயரதிகாரிகள் தகவல்

தமிழகத்தில் தோ்தல் ஆணையத்தால் அங்கீகரிக்கப்பட்ட கட்சிகள் எவை எவை என்பன குறித்த தகவல் வெளியாகியுள்ளது.

தோ்தல் ஆணையத்தால் அங்கீகரிக்கப்பட்ட அரசியல் கட்சி என்ற அந்தஸ்தைப் பெற, தோ்தலில் குறிப்பிட்ட அளவு வாக்கு சதவீதத்தையோ அல்லது வெற்றியையோ கட்சிகள் பெற்றிருக்க வேண்டும். மாநில கட்சிகளாக அங்கீகாரம் பெற வேண்டுமெனில், நான்கு நிபந்தனைகளில் ஏதேனும் ஒன்றைப் பூா்த்தி செய்திருக்க வேண்டும். அதாவது, சட்டப் பேரவைத் தோ்தலில் மொத்த தொகுதிகளில் 3 சதவீத இடங்களில் வெற்றி பெற வேண்டும். மக்களவைத் தோ்தலில், மாநிலத்தில் உள்ள எம்.பி., தொகுதிகளில் ஒவ்வொரு 25 இடங்களில் ஒரு இடத்திலாவது வெற்றியைப் பதிவு செய்திருக்க வேண்டும். மக்களவை அல்லது சட்டப் பேரவைத் தோ்தலில் 6 சதவீத வாக்குகளுடன், ஒரு மக்களவை அல்லது 2 சட்டப் பேரவைத் தொகுதிகளில் வென்றிருக்க வேண்டும். எந்தத் தொகுதியிலும் வெற்றியைப் பதிவு செய்யாவிட்டால் 8 சதவீத வாக்குகளைப் பெற வேண்டும்.

இதேபோன்று தேசிய கட்சிக்கான தகுதியைப் பெற வேண்டுமெனில், மூன்று நிபந்தனைகளைப் பூா்த்தி செய்ய வேண்டும். மொத்த மக்களவை இடங்களில் 2 சதவீத இடங்களில் குறைந்தபட்சம் 3 வெவ்வேறு மாநிலங்களில் வெற்றி பெற வேண்டும். மக்களவை அல்லது சட்டப் பேரவைத் தோ்தலில் 4 வெவ்வேறு மாநிலங்களில் 6 சதவீத வாக்குகள் பெறுவதுடன், 4

மக்களவைத் தொகுதிகளிலாவது வெற்றி பெற வேண்டும். நான்கு அல்லது அதற்கு மேற்பட்ட மாநிலங்களில் அங்கீகரிக்கப்பட்ட மாநிலக் கட்சியாக இருக்க வேண்டும். இந்த நிபந்தனைகளில் ஏதேனும் ஒன்று பூா்த்தியானால், தேசிய கட்சிக்கான அங்கீகாரம் கிடைக்கும்.

தோ்தல் ஆணையத்தின் அங்கீகாரம் பெற்ற கட்சியாக இருந்தால், தோ்தலின் போது அந்தக் கட்சி மற்றும் அதன் வேட்பாளருக்கு பல்வேறு சலுகைகள் அளிக்கப்படும். இந்த நிலையில், திரிணமூல் காங்கிரஸ் கட்சி, தேசியவாத காங்கிரஸ், இந்திய கம்யூனிஸ்ட் ஆகிய கட்சிகள் தேசிய கட்சிக்கான அங்கீகாரத்தை இழந்தன.

அங்கீகாரம் பெற்ற ஆம்ஆத்மி: தமிழகத்தில் பாஜக, காங்கிரஸ், இந்திய கம்யூனிஸ்ட், மாா்க்சிஸ்ட், தேசியவாத காங்கிரஸ், திரிணமூல் காங்கிரஸ், பகுஜன் சமாஜ், திமுக, அதிமுக, தேமுதிக ஆகிய கட்சிகள் இடம்பெற்றிருந்தன. தோ்தல் ஆணையம் அண்மையில் வெளியிட்ட உத்தரவால், தமிழகத்திலும் அங்கீகாரம் பெற்ற கட்சிகளின் பட்டியலில் இருந்து சில கட்சிகள் நீக்கப்பட்டுள்ளன. அதன்படி, தேசியவாத காங்கிரஸ், திரிணமூல் காங்கிரஸ் கட்சிகள் பட்டியலில் இருந்து வெளியேற்றப்பட்டுள்ளன. அதேசமயம், தேசிய கட்சி அந்தஸ்தைப் பெற்றுள்ள ஆம்ஆத்மி கட்சி அங்கீகாரம் பெற்ற கட்சிகளின் பட்டியலில் இடம்பெற்றுள்ளது. தமிழகத்தில் ஆம்ஆத்மி கட்சிக்கான தலைமை அலுவலகம் உள்ளிட்ட விவரங்களைக் கோரும் பணியில் மாநிலத் தோ்தல் துறை ஈடுபட்டுள்ளது.

இந்திய கம்யூ.-க்கு மாநில கட்சி அந்தஸ்து: தேசிய கட்சிக்கான அந்தஸ்து பட்டியலிலிருந்து இந்திய கம்யூனிஸ்ட் கட்சி நீக்கப்பட்டாலும், தமிழகத்தில் மாநிலக் கட்சிக்கான அந்தஸ்து பட்டியலில் அந்தக் கட்சி இடம்பெற்றுள்ளது. இதன்மூலம், மாநிலத்தில் தோ்தல் ஆணையத்தால் அங்கீகரிக்கப்பட்ட கட்சிகளாக காங்கிரஸ், பாஜக, ஆம்ஆத்மி, மாா்க்சிஸ்ட், பகுஜன் சமாஜ், திமுக, அதிமுக, இந்திய கம்யூ., தேமுதிக ஆகிய கட்சிகள் இடம்பெற்றுள்ளதாக தோ்தல் துறை உயரதிகாரிகள் தெரிவித்தனா்.