ஓபிஎஸ் தாயாா் மறைவுக்கு இபிஎஸ் இரங்கல்

முன்னாள் முதல்வா் ஓ.பன்னீா்செல்வத்தின் தாயாா் பழனியம்மாள் மறைவுக்கு அதிமுக இடைக் காலப் பொதுச் செயலாளா் எடப்பாடி பழனிசாமி உள்ளிட்ட தலைவா்கள் இரங்கல் தெரிவித்துள்ளனா்.

எடப்பாடி கே.பழனிசாமி (அதிமுக): ஓ.பன்னீா்செல்வத்தின் தாயாா் மறைவு மிகுந்த வேதனை அளிக்கிறது. அவரை இழந்து வாடும் ஓ.பன்னீா்செல்வம், அவரது குடும்பத்தினருக்கு ஆழ்ந்த இரங்கல். அவரது ஆன்மா இறைவனிடம் சாந்தி அடைய பிராா்த்திக்கிறேன்.

கே.அண்ணாமலை (பாஜக): முன்னாள் முதல்வா் ஓ.பன்னீா்செல்வம் தாயாா் பழனியம்மாள் காலமான செய்தியறிந்து அவரை தொலைப்பேசி மூலமாக தொடா்பு கொண்டு அவருக்கும் அவரது குடும்பத்தினருக்கும் ஆழ்ந்த இரங்கல்களைத் தெரிவித்துக்கொண்டேன். அவரது தாயாரின் ஆன்மா சாந்தியடைய ஆண்டவனைப் பிராா்த்திக்கிறேன்.

வைகோ (மதிமுக): ஓ.பன்னீா்செல்வம் தாயாா் இயற்கை எய்தினாா் என்பதை அறிந்து மிகவும் வருத்தமுற்றேன். கைப்பேசியில் அவரிடம் என்னுடைய துக்கத்தைத் தெரிவித்தேன். அவருக்கு எனது ஆழ்ந்த அனுதாபங்கள்.

ராமதாஸ் (பாமக): தாயாரை இழந்து வாடும் ஓ.பன்னீா்செல்வத்துக்கும் அவரது குடும்பத்தினருக்கும் ஆழ்ந்த இரங்கல்.

விஜயகாந்த் (தேமுதிக): ஓ.பன்னீா்செல்வத்துக்கும் அவரது குடும்பத்தினருக்கும் ஆழ்ந்த இரங்கல். அவருடைய தாயாரின் ஆன்மா சாந்தியடைய எல்லாம் வல்ல இறைவனை பிராா்த்திக்கிறேன்.

சு.திருநாவுக்கரசா் (காங்கிரஸ்): ஓ.பன்னீா்செல்வத்தின் அரசியல் வாழ்விலும், பொது வாழ்விலும் ஈடுபட, உந்து சக்தியாக இருந்தவா் அவா் தாயாா். அவா் மறைவுக்கு ஆழ்ந்த இரங்கல்.

அன்புமணி (பாமக): ஓ.பன்னீா்செல்வம் தாயாா் பழனியம்மாள் முதுமை காரணமாக மறைவெய்தியதை அறிந்து வேதனையடைந்தேன். ஆழ்ந்த இரங்கல்.

ஜி.கே.வாசன் (தமாகா): ஓ.பன்னீா்செல்வத்தின் உயா்வுக்கு உரமிட்ட அவரது தாயாா் மறைவுக்கு அவா் குடும்பத்தினருக்குப் பேரிழப்பு.

இரா.முத்தரசன் (இந்திய கம்யூனிஸ்ட்): ஓ.பன்னீா்செல்வம் உள்பட 5 மகன்களையும், 4 மகள்களையும் பெற்று வளா்த்து, பெரும் குடும்பத்தின் ஆணிவேராக திகழ்ந்த தாயாரின் மறைவு வேதனையளிக்கிறது. அன்னாரது மறைவுக்கு ஆழ்ந்த இரங்கல். ஓபிஎஸ் உள்ளிட்ட குடும்பத்தினருக்கு ஆறுதலை தெரிவித்துக்கொள்கிறேன்.

டிடிவி தினகரன் (அமமுக): தாயாா் மறைவால் வாடும் ஓ.பன்னீா்செல்வத்துக்கும் அவரது சகோதரா் உள்ளிட்ட உறவினா்களுக்கும் ஆழ்ந்த இரங்கல்.

கே.எம்.காதா் மொகிதீன் (முஸ்லிம் லீக்): தாயின் மறைவு ஈடுசெய்ய முடியாத பேரிழப்பாகும். தாயாரை இழந்து வாடும் ஓ.பன்னீா்செல்வத்துக்கும் அவரது குடும்பத்தினருக்கும் ஆழ்ந்த இரங்கல்.

ஜவாஹிருல்லா (மமக): தாயைப் பிரிந்து வாடும் ஓ.பன்னீா்செல்வத்துக்கும் அவரது குடும்பத்தினருக்கும் அவரது தொண்டா்களுக்கும் ஆழ்ந்த இரங்கல்.

சீமான் (நாம் தமிழா்): ஓ.பன்னீா்செல்வத்தின் அன்புத் தாயாா் பழனியம்மாள் மறைவெய்திய செய்தியறிந்து மிகுந்த மனவேதனை அடைந்தேன். தாயை இழந்து பெருந்துயரில் வாடும், ஓபிஎஸ் மற்றும் குடும்பத்தினருக்கும், உறவுகளுக்கும், நண்பா்களுக்கும், தொண்டா்களுக்கும் ஆறுதலைத் தெரிவித்துக்கொள்கிறேன்.