இன்றுமுதல் கோவைக்கு வந்தே பாரத் வாராந்திர சிறப்பு ரயில்

பயணிகள் கூட்ட நெரிசலைக் கட்டுப்படுத்துவதற்காக சென்னை சென்ட்ரலில் இருந்து கோவைக்கு செவ்வாய்க்கிழமை (நவ.28) முதல் ஜன.30-ஆம் தேதி வரை வாராந்திர வந்தே பாரத் சிறப்பு ரயில் இயக்கப்படவுள்ளது.

இது குறித்து தெற்கு ரயில்வே சாா்பில் திங்கள்கிழமை வெளியிட்ட செய்திக் குறிப்பு:

நவ.28 முதல் ஜன.30 -ஆம் தேதி வரை வாரந்தோறும் செவ்வாய்க்கிழமை சென்னை சென்ட்ரலிலிருந்து காலை 7.10 மணிக்கு புறப்படும் வந்தே பாரத் சிறப்பு ரயில் (எண்: 06035) பிற்பகல் 2.15 மணிக்கு கோவை சென்றடையும்.

மறுமாா்க்கமாக இந்த ரயில் (எண்: 06036) அதே நாள்களில் கோவையிலிருந்து பிற்பகல் 3.05 மணிக்கு புறப்பட்டு இரவு 9.50 மணிக்கு சென்ட்ரல் வந்தடையும். இந்த ரயில் சென்ட்ரலிலிருந்து காட்பாடி, ஜோலாா்பேட்டை, சேலம், ஈரோடு, திருப்பூா் வழியாக கோவை சென்றடையும் என்று தெரிவிக்கப்பட்டுள்ளது.