வங்கக்கடலில் உருவானது காற்றழுத்த தாழ்வுப் பகுதி!

வடமேற்கு வங்கக்கடல் பகுதியில் உருவாகியுள்ள காற்றழுத்த தாழ்வு பகுதியால் தென் மாநிலங்களில் மழை பெய்யக்கூடும் என்று தெரிவிக்கப்பட்டுள்ளது.

சென்னை வானிலை ஆய்வு மையம் புதன்கிழமை வெளியிட்ட அறிவிப்பு: புதன்கிழமை காலை வடமேற்கு வங்கக்கடல் மற்றும் அதனையொட்டிய மத்திய மேற்கு வங்கக்கடலில் காற்றழுத்த தாழ்வுப் பகுதி உருவாகியுள்ளது. இது அடுத்த 3 நாள்களில் ஒடிஸா, அதனையொட்டிய கடற்பகுதிகளை நோக்கி நகரக்கூடும். இதனால் ஒடிஸா, ஆந்திரம், தெலங்கானா மற்றும் வடமாநிலங்களில் மழைக்கு வாய்ப்பு உள்ளது.

அதே நேரத்தில், மேற்கு திசை காற்றின் வேக மாறுபாடு காரணமாக, வியாழன் முதல் செவ்வாய்க்கிழமை (செப்.14-19) வரை தமிழ்நாடு, புதுச்சேரி, காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

மழை அளவு (மி.மீ): வானூா்(விழுப்புரம்) -90, முகையூா்(விழுப்புரம்)-70, வெங்கூா் (கள்ளக்குறிச்சி) , கொள்ளிடம்(மயிலாடுதுறை) தலா 50, கீழ்அணைக்கட்டு(தஞ்சாவூா்), திருக்கோயிலூா்(கள்ளக்குறிச்சி), புதுச்சேரி தலா 40.

மீனவா்களுக்கான எச்சரிக்கை: இலங்கை கடலோரப் பகுதிகள், தெற்கு வங்கக்கடல் மற்றும் அதனையொட்டிய மத்திய வங்கக்கடல் பகுதிகளில் வியாழக்கிழமை (செப்.14) மணிக்கு 55 கி.மீ. வேகத்தில் சூறாவளிக் காற்று வீசக்கூடும்.

சென்னையில்..:சென்னை மற்றும் அதன் புகா் பகுதிகளில் அடுத்த 48 மணி நேரத்துக்கு வானம் மேகமூட்டத்துடன் காணப்படும். நகரின் ஒரு சில பகுதிகளில் இடி மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது என தெரிவிக்கப்பட்டுள்ளது.