தமிழக உள் மாவட்டங்களில் 106 டிகிரி வரை வெயில் சுட்டெரிக்கும்!

சென்னை, ஏப்.12: தமிழக உள் மாவட்டங்களில் ஞாயிற்றுக்கிழமை (ஏப்.14) வெப்ப அளவு 106 டிகிரி ஃபாரன்ஹீட் வரை இருக்கும் என்று வானிலைஆய்வு மையம் எச்சரித்துள்ளது.

இது குறித்து வெள்ளிக்கிழமை வெளியிடப்பட்ட செய்திக் குறிப்பில் மேலும் கூறியிருப்பதாவது:

வெள்ளிக்கிழமை நிலவரப்படி, தமிழகத்தில் 8 இடங்களில் வெயில் சதம் அடித்துள்ளது. அதன்படி, ஈரோடு - 104 டிகிரி ஃபாரன்ஹீட், திருப்பத்தூா் - 103.64, சேலம் - 102.74, பரமத்திவேலூா் - 101.3, காரைக்கால் - 101.12, வேலூா் - 100.72, நாமக்கல் - 100.4, திருத்தணி - 100.04 டிகிரி வெப்பம் பதிவானது.

தென் தமிழகம், வட தமிழகம் மற்றும் மேற்கு தொடா்ச்சி மாவட்டங்களில் சனிக்கிழமை (ஏப்.13) அதிகபட்ச வெப்பநிலை இயல்பை விட சற்று குறைய வாய்ப்புள்ளது.

மேலும், ஏப்.14 முதல் ஏப்.16 வரை தமிழகம், புதுச்சேரி மற்றும் காரைக்காலில் பெரும்பாலான இடங்களில் வெப்பநிலை இயல்பை விட 4 டிகிரி செல்சியஸ் வரை அதிகமாக இருக்கும். சென்னை மற்றும் புகா் பகுதிகளில் அடுத்த 2 நாள்களுக்கு வானம் ஓரளவு மேகமூட்டத்துடன் காணப்படும் என்று தெரிவிக்கப்பட்டுள்ளது.