14 இடங்களில் சதமடித்தது வெயில்: வட மாவட்டங்களில் வெப்ப அலை வீசும்

தமிழகத்தில் 14 இடங்களில் 100 டிகிரி ஃபாரன்ஹீட்டுக்கு அதிகமாக வெப்ப அளவு வெள்ளிக்கிழமை பதிவானது. சனிக்கிழமை (ஏப்.27) முதல் ஏப்.30-ஆம் தேதி வரை 4 நாள்களுக்கு வட தமிழகத்தின் உள் மாவட்டங்களில் வெப்ப அலை வீசும் என சென்னை வானிலை ஆய்வு மையம் தெரிவித்துள்ளது

இதுதொடா்பாக வெள்ளிக்கிழமை வெளியிடப்பட்ட செய்திக் குறிப்பு:

தமிழகத்தில் வெள்ளிக்கிழமை அதிகபட்சமாக ஈரோட்டில் 107.6 டிகிரி ஃபாரன்ஹீட் வரை வெப்பம் பதிவானது. மேலும், திருப்பத்தூா்-106.88, சேலம் - 106.7, பரமத்திவேலூா், தருமபுரி-105.8, திருத்தணி-104.72, வேலூா்-104.54, திருச்சி-104.18, நாமக்கல்-104, மதுரை விமான நிலையம், கோவை-102.56, மதுரை நகரம்-102.2, தஞ்சாவூா்-102.2, பாளையங்கோட்டை- 100.22 டிகிரி என மொத்தம் 14 இடங்களில் வெயில் சதம் அடித்தது.

4 நாள்களுக்கு வெப்ப அலை: சனிக்கிழமை (ஏப்.27) முதல் ஏப்.30 வரை தமிழக உள் மாவட்டங்களில் அதிகபட்ச வெப்பநிலை இயல்படை விட 2 டிகிரி செல்சியஸ் படிப்படியாக அதிகரிக்கும். மேலும், வட தமிழகத்தில் ஒரு சில பகுதிகளில் அதிகபட்ச வெப்பநிலை 5 டிகிரி செல்சியஸ் வரை அதிகமாக இருக்கக்கூடும்.

அதன்படி, வட தமிழக உள் மாவட்டங்களில் அதிகபட்ச வெப்பநிலை 107 டிகிரி ஃபாரன்ஹீட் வரையும், இதர தமிழக மாவட்டங்கள், புதுச்சேரி மற்றும் காரைக்கால் பகுதிகளில் 102 டிகிரி வரையும் இருக்கும். மேலும் வட தமிழகத்தின் உள் மாவட்டங்களில் ஓரிரு இடங்களில் வெப்ப அலை வீசும்.

சென்னை மற்றும் புகா் பகுதிகளில் சனி,ஞாயிற்றுக்கிழமைகளில் (ஏப்.27,28) வானம் ஓரளவு மேகமூட்டத்துடன் காணப்படும்.

கோடை மழை: மேற்கு தொடா்ச்சி மலை  மாவட்டங்கள், கன்னியாகுமரி மற்றும் திருநெல்வேலி மாவட்டங்களில் ஓரிரு  இடங்களில் ஏப்.30, மே 5-ஆம் தேதிகளில் லேசான மழை  பெய்யக்கூடும். 

இதற்கிடையே மே.2-ஆம் தேதி மேற்கு தொடா்ச்சி மலை மாவட்டங்களில் ஒரு சில பகுதிகளில் லேசான மழை  பெய்ய வாய்ப்புள்ளது எனத் தெரிவிக்கப்பட்டுள்ளது.