தமிழகம் கோரும் நிவாரணம் மீது மத்திய அரசுக்கு அக்கறை இல்லை: மக்களவையில் கதிா் ஆனந்த் எம்.பி. புகாா்

நமது சிறப்பு நிருபா்

புது தில்லி: தமிழகம் கோரும் நிவாரணம் மீது மத்திய அரசுக்கு அக்கறை இல்லை என்று மக்களவையில் வேலூா் தொகுதி திமுக உறுப்பினா் கதிா் ஆனந்த் குற்றம்சாட்டினாா்.

மக்களவையில் 2024-25 நிதியாண்டுக்கான துணை மானியக் கோரிக்கை மீது திங்கள்கிழமை நடைபெற்ற விவாதத்தில் வேலூா் தொகுதி திமுக உறுப்பினா் கலந்து கொண்டு பேசியது: பாஜக தலைமையிலான மத்திய அரசு 2016 ஆண்டு 2022-க்குள் விவசாயிகளின் வருவாய் இரட்டிப்பு ஆக்குவோம் என உறுதியளித்தது. இதற்காகவே 2019-ஆம் ஆண்டு பிரதமரின் விவசாயிகள் ஊக்கநிதி திட்டத்தை அறிமுகப்படுத்தியது. இதன் மூலம் ஆண்டொன்றுக்கு மூன்று தவணைகளில் ரூ. 6,000 வழங்குகிறது. ஆனால், இது முறையாக செயல்படுத்தப்படவில்லை.

மற்றொரு முக்கியமான குறைபாடுள்ளது விவசாய பயிா் காப்பீடு திட்டம். இத்திட்டத்திற்கான ஒதுக்கீடு ரூ. 15,000 கோடியில் இருந்து ரூ.14,600 கோடியாகக் குறைந்தது (3 சதவீதம்) . இது சுற்றுச் சூழல் மற்றும் வானிலை மாற்றத்துக்காக ஒதுக்கீடு செய்தது. நாடாளுமன்ற நிலைக்குழு பரிந்துரையின்படி வானிலை மாற்றம் பாதிப்புகளை கருத்தில் கொண்டு அதிக நிதி ஒதுக்கீடு செய்ய வேண்டும். ஆனால், மத்திய அரசு அதைச் செய்யத் தவறிவிட்டது.

தமிழ் நாட்டில் வெள்ள பாதிப்புகளுக்கு நிவாரணம் வழங்க நிவாரண நிதி கேட்டதற்கு மத்திய அரசு பாராமுகம் காட்டுவது வருத்தம் அளிக்கிறது. மத்திய அரசு அரிசி மீது விதிக்கும் 5 சதவீதம் சரக்கு, சேவைகள் வரியை (ஜிஎஸ்டி) குறைக்க வேண்டும். தமிழகத்துக்கு மத்திய அரசு ஒதுக்கீடு செய்யும் கோதுமை, மண்ணெண்ணெய் ஆகியவற்றின் அளவை அதிகரிக்க வேண்டும்.

குறிப்பாக, மலைப்பகுதிகளுக்கு வழங்கும் ஒதுக்கீடு அதிகரிக்கப்பட வேண்டும்.

இந்த அரசு பதவியேற்றது முதல் வேலைவாய்ப்பு அதிகரிக்க எந்த வித முயற்சியும் எடுக்கவில்லை. இந்தப் பேரவைக்கு இரண்டாவது முறையாக மீண்டும் தோ்ந்தெடுக்கப்பட்ட பிறகும் கூட வேலூரில் விமான நிலையம் இயக்கும் கோரிக்கையை வலியுறுத்தி வருகிறேன். கடந்த தோ்தல் பிரசாரத்தின்போது பிரதமா் நரேந்திர மோடி வேலூரில் உள்ள விமான நிலையத்தில் வந்திறங்கினாா். அந்த வேலூா் விமான நிலையம் இன்றுவரை மக்கள் பயன்பாட்டுக்காக திறக்கப்படவில்லை.

இந்தியாவில் ஏராளமான பணி ஓய்வு பெற்ற ராணுவ வீரா்கள் உள்ளனா். அவா்களுக்கும் அவா்கள் குடும்பத்தினா்களுக்கும் உரிய மருத்துவ சிகிச்சை அளிக்க பல தனியாா் மருத்துவமனைகள் முன்வருவதில்லை. அவா்களுக்கு உரிய மருத்துவ சிகிச்சை கிடைக்க மத்திய அரசு நடவடிக்கை எடுக்க வேண்டும். தமிழகத்தை எதிரி மாநிலமாக கருதாமல் நாட்டின் உள்ள ஒரு மாநிலமாக கருத வேண்டும் என்றாா் அவா்.

பெட்டிச்செய்தி

கேட்ட நிதி கிடைப்பதில்லை:

தென் சென்னை எம்.பி புகாா்

தமிழகத்தில் வெள்ள நிவாரணத்துக்கு மாநில அரசு கோரிய நிதி சரிவர வழங்கப்படுவதில்லை என்று மக்களவையில் தென் சென்னை தொகுதி திமுக உறுப்பினா் தமிழச்சி தங்கப்பாண்டியன் புகாா் தெரிவித்தாா்.

இது தொடா்பாக அவையின் கவனத்துக்கு முக்கிய விவகாரங்களை கொண்டு வர திங்கள்கிழமை அனுமதிக்கப்பட்ட நேரத்தில் தமிழச்சி தங்கப்பாண்டியன் பேசியது:

ஃபென்ஜால் புயல் தமிழகத்தின் வட மாவட்டங்களைச் சீா்குலைத்துள்ளது. உள்கட்டமைப்பு, வாழ்வாதாரம், மக்களின் அன்றாட வாழ்க்கை, குறிப்பாக திருவண்ணாமலையில் நிலச்சரிவு பெரும் பாதிப்பை ஏற்படுத்தியிருக்கிறது. அந்த நிலைமையை தமிழக முதல்வா் ஸ்டாலின் திறம்பட கையாண்டாா். ரூ. 30 கோடிக்கு மேல் நலன்புரி நடவடிக்கைகளுக்காகவும், ரூ. 37 கோடி சுய உதவிக் குழுக்கள் மூலமும் செயல்படுத்த மாநில அரசு நிதி ஒதுக்கியது. இருந்தபோதும் நிலைமையை சீரமைக்க அதிக பணம் தேவைப்பட்டதால் மத்திய அரசிடம் உரிய நிவாரண நிதி வழங்க பிரதமரிடம் முதல்வா் கோரிக்கை வைத்தாா். ஆனால், மாநில அரசு கேட்ட ரூ. 2000 கோடியில் ஒரு பகுதியைக் கூட அரசு வழங்கவில்லை. வசுதைவகுடும்பகம் என்ற முழக்கத்தை பிரதமா் எப்போதும் முன்வைக்கிறாா். தமிழகமும் அந்த குடும்பத்தில் ஒரு அங்கம்தான் இதை மறக்கக்கூடாது என்றாா் அவா்.

16க்ங்ப்ந்ஹற் - கதிா் ஆனந்த்

16க்ங்ப்ற்ட்ஹ - தமிழச்சி தங்கப்பாண்டியன்