சென்னை கிளாம்பாக்கத்தில் இருந்து தென் மாவட்டங்களுக்கு இயக்கப்படும் பேருந்துகளின் கட்டணத்தை தமிழக அரசு குறைத்துள்ளது.
சென்னை புறநகர்ப் பகுதியான கிளாம்பாக்கத்தில் கலைஞர் நூற்றாண்டு பேருந்து நிலையத்தை முதல்வர் மு.க.ஸ்டாலின் கடந்த 30-ஆம் தேதி திறந்துவைத்தார்.
தற்போது முதல்கட்டமாக கிளாம்பக்கம் பேருந்து நிலையத்தில் இருந்து தென்மாவட்ட முக்கிய நகரங்களுக்கு 164 அரசு விரைவுப் பேருந்துகளும், சென்னையில் உள்ள முக்கிய இடங்களுக்கு மாநகரப் பேருந்துகளும் இயக்கப்பட்டு வருகின்றன.
இந்த நிலையில், கோயம்பேட்டில் இருந்து கிளாம்பக்கம் புதிய பேருந்து நிலையம் சுமார் 32 கி.மீ. தொலைவில் முன்னதாகவே இருப்பதால், கிளாம்பக்கத்தில் இருந்து வெளியூர்களுக்கு இயக்கப்படும் பேருந்துகளின் கட்டணம் குறைக்கப்பட்டுள்ளது.
கோயம்பேட்டில் இருந்து தென் மாவட்டங்களுக்கு வசூலிக்கப்படும் கட்டணத்தைவிட ரூ. 20 முதல் 35 வரை கிளாம்பாக்கம் பேருந்து நிலையத்திலிருந்து இயக்கப்படும் பேருந்துகளில் கட்டணம் குறைக்கப்பட்டுள்ளது.
மேலும், அரசு விரைவுப் பேருந்துகளில் ஒரு மாதத்திற்கு முன்னதாகவே முன்பதிவு செய்தவர்களுக்கு நடத்துநர்கள் மூலம் குறைக்கப்பட்ட தொகையை திருப்பி அளிக்க நடவடிக்கை எடுக்கப்பட்டுள்ளது.