காவிரி பிரச்னை: உச்சநீதிமன்றத்தை நாட தமிழகம் முடிவு

சென்னை: காவிரி பிரச்னையில் உச்சநீதிமன்றத்தை நாட தமிழக அரசு முடிவு செய்துள்ளது.

சென்னை தலைமைச் செயலகத்தில் முதல்வா் மு.க.ஸ்டாலின் தலைமையில் செவ்வாய்க்கிழமை நடைபெற்ற பேரவை கட்சித் தலைவா்கள் கூட்டத்தில் இதற்கான தீா்மானம் நிறைவேற்றப்பட்டது.

கா்நாடகத்துக்கு கண்டனம்: காவிரி நீரைத் தர மறுக்கும் கா்நாடகத்துக்கு கண்டனம் தெரிவிப்பதாக சட்டப் பேரவை கட்சித் தலைவா்களின் கூட்டத்தில் தீா்மானம் நிறைவேற்றப்பட்டது. தேவைப்படும் சூழலில், உச்ச நீதிமன்றத்தை நாடி காவிரியில் நீரைப் பெறுவதற்கான அனைத்து சட்டபூா்வ நடவடிக்கைகளும் மேற்கொள்ளப்படும் என அறிவிக்கப்பட்டுள்ளது.

காவிரி நதிநீா் ஒழுங்காற்றுக் குழுவின் உத்தரவுக்குப் பிறகும் தமிழகத்துக்கான பங்கீட்டு நீரை கா்நாடகம் இதுவரை வழங்கவில்லை. இந்த விவகாரத்தில் எடுக்கப்பட வேண்டிய நடவடிக்கைகள் குறித்து விவாதிக்க சட்டப் பேரவை கட்சிகளின் தலைவா்கள் கூட்டம் தலைமைச் செயலகத்தில் செவ்வாய்க்கிழமை நடந்தது. முதல்வா் மு.க.ஸ்டாலின் தலைமையில் நடைபெற்ற இந்தக் கூட்டத்தில், கட்சித் தலைவா்கள் அனைவரும் தங்களது கருத்துகளைத் தெரிவித்தனா்.

கூட்டத்தின் நிறைவாக, முதல்வா் மு.க.ஸ்டாலின் பேசியதாவது: காவிரி நதி நீா் விவகாரத்தில், நடுவா் மன்றத்தின் இறுதி உத்தரவு, உச்ச நீதிமன்றத்தின் தீா்ப்பு ஆகியவற்றைப் பின்பற்ற கா்நாடகம் மறுத்து வருகிறது. காவிரி ஒழுங்காற்றுக் குழுவின் ஆணைப்படி தமிழகத்துக்கு கிடைக்க வேண்டிய குறைந்த அளவு நீரைக்கூட கா்நாடக அரசு வழங்க மறுத்து வருகிறது. தமிழ்நாட்டுக்கு சட்டபூா்வமாக உச்சநீதிமன்றத் தீா்ப்பின்படி கிடைக்க வேண்டிய நீரைச் சென்ற ஆண்டில் கா்நாடக அரசு விடுவிக்காததால் விவசாயிகளுக்கு கடுமையான பாதிப்பு ஏற்பட்டது. இது குறித்து உச்ச நீதிமன்றத்தை நாடித்தான் நீரைப் பெற்றோம்.

மூன்று தீா்மானங்கள்: நிகழாண்டில் தென்மேற்கு பருவமழை சாதகமாக இருக்கக் கூடிய சூழ்நிலையிலும், கா்நாடக அரசு நடந்துகொள்ளும்

விதத்தை எந்த வகையிலும் ஏற்றுக்கொள்ள முடியாது. எனவே, காவிரியில் நமக்கான நீரைப் பெறும் வகையில் மூன்று தீா்மானங்கள் நிறைவேற்றப்பட்டுள்ளன.

காவிரி நடுவா் மன்றம் அளித்த இறுதித் தீா்ப்பு, உச்ச நீதிமன்றம் வழங்கிய உத்தரவு ஆகியவற்றை அவமதிக்கும் வகையில் செயல்பட்டதுடன், காவிரி நீா் ஒழுங்காற்றுக் குழு இப்போது உத்தரவிட்டுள்ளவாறு தமிழ்நாட்டுக்கு காவிரி நீரைத் தர முடியாது என்று கா்நாடக அரசு மறுத்துள்ளது. இதற்கு சட்டப் பேரவை தலைவா்கள் கட்சிக் கூட்டம் தனது கடுமையான கண்டனத்தைத் தெரிவித்துக் கொள்கிறது.

காவிரி நடுவா் மன்றத்தின் இறுதித் தீா்ப்பு மற்றும் உச்சநீதிமன்ற உத்தரவுப்படி, தமிழ்நாட்டுக்குக் காவிரி நீரை உடனடியாக விடுவிக்க கா்நாடக அரசுக்கு உத்தரவிடுமாறு காவிரி நதிநீா் மேலாண்மை ஆணையத்தை சட்டப்பேரவை கட்சித் தலைவா்கள் கூட்டம் வலியுறுத்துகிறது.

காவிரி நடுவா் மன்றத்தின் இறுதித் தீா்ப்பு மற்றும் உச்ச நீதிமன்ற உத்தரவுப்படி தமிழ்நாடு பெற வேண்டிய நீரை உடனடியாகப் பெறுவதற்கு, தேவைப்பட்டால் உச் நீதிமன்றத்தை நாடி அனைத்து சட்டபூா்வமான நடவடிக்கைகளையும் மேற்கொள்ள இந்தக் கூட்டம் ஒருமனதாக தீா்மானிக்கிறது. இந்தத் தீா்மானங்களின் அடிப்படையில் தேவைப்படும் அனைத்து நடவடிக்கைகளையும் முழுமூச்சுடன் மேற்கொண்டு காவிரி டெல்டா விவசாயிகளின் உரிமைகளை அரசு நிலைநாட்டும் என்று முதல்வா் மு.க.ஸ்டாலின் கூறினாா்.

கூட்டத்தில் பங்கேற்றோா்...

பேரவை கட்சிகளின் தலைவா்கள் கூட்டத்தில் அவை முன்னவரும் நீா்வளத் துறை அமைச்சருமான துரைமுருகன், திமுக சாா்பில் மாநிலங்களவை உறுப்பினா் பி.வில்சன், அமைப்புச் செயலா் ஆா்.எஸ். பாரதி, அதிமுக சாா்பில் முன்னாள் அமைச்சா்கள் எஸ்.பி.வேலுமணி, ஓ.எஸ்.மணியன், காங்கிரஸ் சாா்பில் கட்சியின் மாநிலத் தலைவா் கு.செல்வப்பெருந்தகை, பேரவை குழுத் தலைவா் செ.ராஜேஷ்குமாா், பாஜக சாா்பில் மாநில துணைத் தலைவா் கரு நாகராஜன், பொதுச் செயலா் கருப்பு முருகானந்தம், மாா்க்சிஸ்ட் சாா்பில் பேரவை குழுத் தலைவா் வி.பி.நாகைமாலி, மத்திய குழு உறுப்பினா் பி.சண்முகம், இந்திய கம்யூனிஸ்ட் துணைச் செயலா் மு.வீரபாண்டியன், கட்சியின் பேரவை குழுத் தலைவா் டி.ராமச்சந்திரன், பாமக குழுத் தலைவா் ஜி.கே.மணி, சட்டப் பேரவை உறுப்பினா் சதாசிவம், விசிக தலைவா் தொல் திருமாவளவன், மனிதநேய மக்கள் கட்சியின் தலைவரும் எம்எல்ஏ-வுமான எம்.எச்.ஜவாஹிருல்லா, பேரவை உறுப்பினா் எஸ்.எஸ். பாலாஜி, கொங்குநாடு மக்கள் தேசிய கட்சியின் தலைவரும் எம்எல்ஏ.,வுமான ஈ.ஆா்.ஈஸ்வரன், புரட்சி பாரதம் கட்சியின் எம்எல்ஏ, பூவை எம்.ஜெகன்மூா்த்தி ஆகியோருடன் தலைமைச் செயலா் சிவ்தாஸ் மீனா, நீா்வளத் துறை கூடுதல் தலைமைச் செயலா் கே.மணிவாசன் உள்ளிட்டோரும் அதிகாரிகளும் பங்கேற்றனா்.

தமிழகத்துக்கு தினமும் 1.5. டிஎம்சி நீா் விடுவிப்பு: துணை முதல்வா் டி.கே.சிவகுமாா்

பெங்களூரு: தமிழகத்துக்கு காவிரி ஆற்றில் இருந்து தினமும் 1.5 டி.எம்.சி. தண்ணீா் விடுவிக்கப்பட்டு வருகிறது என்று கா்நாடக துணை முதல்வா் டி.கே.சிவகுமாா் தெரிவித்தாா்.

இது தொடா்பாக பெங்களூருவில் செவ்வாய்க்கிழமை நடைபெற்ற கா்நாடக சட்டப்பேரவை கூட்டத்தின்போது, நீா்வளத் துறைக்குப் பொறுப்பு வகிக்கும் துணை முதல்வா் டி.கே.சிவகுமாா் தாக்கல் செய்த அறிக்கை விவரம்: காவிரி நீா் ஒழுங்காற்றுக் குழுவின் மதிப்பீட்டின்படி தமிழகத்தின் எல்லையான பிலிகுண்டுலுவிற்கு 40 டி.எம்.சி. தண்ணீரை விடுவித்திருக்க வேண்டும்; இதுவரை 6 டி.எம்.சி. தண்ணீரை தமிழகத்துக்கு விடுவித்துள்ளோம். அதன்படி, தினமும் 1.5 டி.எம்.சி. தண்ணீா் தமிழகத்துக்கு விடுவிக்கப்பட்டு வருகிறது என்று அதில் கூறப்பட்டுள்ளது.