பேறுகால இறப்பை பூஜ்ஜிய நிலைக்கு கொண்டு வர 4 புதிய திட்டங்கள்: அமைச்சா் மா.சுப்பிரமணியன்

தமிழகத்தில் பேறுகால இறப்பை பூஜ்ஜியத்துக்கு கொண்டு வருவதற்காக நான்கு புதிய திட்டங்கள் தொடங்கப்பட்டுள்ளதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

சென்னை அடையாறு சமுதாய நகா்ப்புற நல மருத்துவமனையில் 2024-2025- ஆம் ஆண்டு நிதிநிலை அறிக்கையில் குழந்தைகள் மற்றும் பச்சிளம் குழந்தைகளுக்கு அறிவிக்கப்பட்ட திட்டங்களை அமைச்சா் மா.சுப்பிரமணியன் தொடங்கிவைத்து பயன்பாட்டுக்கு கொண்டு வந்தாா்.

இதையடுத்து அவா் செய்தியாளா்களிடம் கூறியதாவது:

நிகழ் நிதியாண்டில் மக்கள் நல்வாழ்வுத் துறை மானியக் கோரிக்கையில் அறிவிக்கப்பட்ட 110 அறிவிப்புகள் தொடா்ந்து நடைமுறைப்படுத்தப்பட்டு வருகின்றன. அதன்படி தற்போது தமிழகத்தில் பிறந்த அனைத்து குழந்தைகளுக்கும் பிறவிக்குறைபாடுகளை கண்டறிய 1,000 அரசு மருத்துவமனைகளில் பரிசோதனைகள் மேற்கொள்ளப்படவுள்ளன. குழந்தைகளுக்கும் பிரத்யேக அடையாள அட்டைகள் இத்திட்டத்தில் வழங்கப்படும். பச்சிளங்குழந்தைகளின் வளா்ச்சி மற்றும் நலத்தை கண்காணிக்க சிறப்பு மையங்கள் 400 இடங்களில் தொடங்கப்பட்டுள்ளன. இதன்மூலம், பிறக்கும் அனைத்து குழந்தைகளுக்கும் பிறவிக் குறைபாடுகள் கண்டறியப்பட்டு, அவற்றுக்கு தீா்வு காணப்படும். குறிப்பாக, வளா்ச்சிக்குறைபாடுகள், செவித்திறன் குறைபாடுகள், பாா்வைக் குறைபாடுகள் போன்ற நோய்களுக்கு சிகிச்சை அளிக்கப்பட்டு, அக்குழந்தைகள் இயல்பாக வளா்வதற்கும், வாழ்வதற்கும் இத்திட்டங்கள் தொடங்கப்பட்டுள்ளன.

இல்லங்களிலேயே கண்காணிப்பு: சிறப்பு பச்சிளம் குழந்தை பராமரிப்பு பிரிவிலிருந்து விடுவிக்கப்படும் குறைப் பிரசவம் மற்றும் எடை குறைவான பச்சிளம் குழந்தைகளை தொடா்ந்து அவா்களது இல்லங்களிலேயே தொழில்நுட்ப உதவியுடன் கண்காணிப்பதற்கான முன்னோடித் திட்டம் சென்னை, செங்கல்பட்டு, கடலூா், கள்ளக்குறிச்சி, காஞ்சிபுரம், திருவண்ணாமலை மற்றும் விழுப்புரம் ஆகிய ஏழு மாவட்டங்களில் செயல்படுத்தப்படும் என்ற அறிவிப்பின்படி இந்தத் திட்டம் ரூ.1.28 கோடியில் தொடங்கி வைக்கப்பட்டுள்ளன. ரூ.1.74 கோடியில் பாதுகாப்பான மற்றும் சுகப்பிரசவத்தை ஊக்குவிக்கும் வகையில், இந்திய மருத்துவ முறையுடன் ஒருங்கிணைந்து, செவிலியா்களுக்கு விரிவான மகப்பேறு பராமரிப்பு குறித்த பயிற்சி தொடங்கப்பட்டுள்ளது.

பெற்றோா் பயன்பாட்டு செயலி: ஆரம்ப கால குழந்தை வளா்ச்சிக்கான பெற்றோா் பயன்பாட்டு செயலி”தொடங்கி வைக்கப்பட்டுள்ளது. இந்த பெற்றோா் பயன்பாட்டு செயலியினால் சுகாதாரச் செய்திகள், கா்ப்பிணிகள் மற்றும் குழந்தைகளுக்கான ஊட்டச்சத்து செய்திகள், கா்ப்பம் மற்றும் பிரசவ காலம் பற்றிய செய்திகள், பிரசவத்துக்குப் பின் கவனிப்பு மற்றும் பிறந்த குழந்தையின் வளா்ச்சியைப் பற்றிய கண்காணிப்பு, குழந்தை பராமரிப்பு பற்றி தெரிந்து கொள்ளுதல் தாய்ப்பாலின் முக்கியத்துவத்தை அறிதல் போன்ற அனைத்து விவரங்களையும் அறிந்து கொள்ளலாம். கா்ப்பம் மற்றும் பிரசவ காலத்தில் ஏற்படும் சிக்கல்களை கண்டறிந்து உடனடியாக பரிந்துரை செய்து தாயின் உயிரை காப்பதற்கும் இந்த செயலி வழிவகை செய்யும்.

தமிழகத்தில் கடந்த மூன்று ஆண்டுகளில் பல்வேறு குழந்தை நலத் திட்டங்களை செயல்படுத்தியதன் மூலம் 1,000 பிறப்புகளுக்கு 10.2 ஆக இருந்த குழந்தை இறப்பு விகிதம், 8-ஆக குறைந்துள்ளதாக சுகாதார மேலாண்மை தகவல் அமைப்பு தெரிவித்துள்ளது. மகப்பேறு மரணத்தை பொருத்தவரை 1 லட்சம் மகப்பேறுக்கு தமிழகம் 40.2 ஆகவும், இந்திய அளவில் 97 ஆகவும் உள்ளது. இந்த இரண்டு இறப்பு விகிதங்களையும் பூஜ்ஜியம் நிலைக்கு கொண்டு செல்வதற்கு இந்த 4 புதிய திட்டங்களும் பயன்பாட்டுக்கு கொண்டு வரப்பட்டுள்ளன என்றாா் அவா்.

இந்த நிகழ்வில் சென்னை மேயா் ஆா்.பிரியா, தேசிய நலவாழ்வுக் குழும இயக்குநா் ஷில்பா பிரபாகா் சதீஷ், இந்திய மருத்துவம் மற்றும் ஹோமியோபதி இயக்குநா் விஜயலட்சுமி, மருத்துவம் மற்றும் ஊரகநலப்பணிகள் இயக்குநா் ஜெ.ராஜமூா்த்தி உள்ளிட்டோா் கலந்து கொண்டனா்.