ஆருயிர் சகோதரர் செந்தில் பாலாஜியே வருக வருக...: முதல்வர் ஸ்டாலின்

தமிழ்நாடு முன்னாள் அமைச்சர் செந்தில் பாலாஜிக்கு உச்சநீதிமன்றம் ஜாமீன் வழங்கியுள்ளதை முதல்வர் மு.க. ஸ்டாலின் வரவேற்றுள்ளார்.

சட்டவிரோத பணப்பரிமாற்ற வழக்கில் அமலாக்கத்துறையால் கைது செய்யப்பட்டு 15 மாதங்களாக விசாரணைக் கைதியாக சிறையில் அடைக்கப்பட்டிருந்த செந்தில் பாலாஜிக்கு உச்சநீதிமன்றம் வியாழக்கிழமை ஜாமீன் வழங்கியது.

உச்சநீதிமன்றத்தின் தீர்ப்பை வரவேற்று தமிழக முதல்வரும் திமுக தலைவருமான முதல்வர் ஸ்டாலின் எக்ஸ் தளத்தில் பதிவிட்டுள்ளார்.

“ஆருயிர் சகோதரர் செந்தில் பாலாஜிக்கு 471 நாட்களுக்குப் பிறகு, உச்ச நீதிமன்றத்தால் பிணை கிடைத்திருக்கிறது.

அமலாக்கத் துறையானது, அரசியல் எதிரிகளை ஒடுக்கும் துறையாக மாற்றப்பட்ட தற்போதைய சூழலில், அதற்கு உச்சநீதிமன்றம் ஒன்றே விடியலாக இருக்கிறது.

எமர்ஜென்சி காலத்தில் கூட இவ்வளவு நாட்கள் சிறை வாழ்க்கை கிடையாது. அரசியல் சதிச் செயல்கள் 15 மாதங்கள் தொடர்ந்தன.

கைது செய்து சிறையிலேயே வைத்துவிடுவதால் சகோதரர் செந்தில் பாலாஜியின் உறுதியைக் குலைக்க நினைத்தார்கள். முன்னிலும் உரம் பெற்றவராய்ச் சிறையில் இருந்து வெளியில் வரும் சகோதரர் செந்தில் பாலாஜியை வருக வருக என வரவேற்கிறேன்.

உன் தியாகம் பெரிது! உறுதி அதனினும் பெரிது!” எனக் குறிப்பிட்டுள்ளார்.

தமிழக அமைச்சரவையில் மாற்றம் மற்றும் துணை முதல்வர் அறிவிப்பு விரைவில் வெளியாகும் என்று எதிர்பார்க்கப்படும் நிலையில், செந்தில் பாலாஜிக்கு மீண்டும் அமைச்சரவையில் இடம் அளிக்க வாய்ப்புள்ளதாக தகவல்கள் தெரிவிக்கின்றன.

இதனிடையே, செந்தில் பாலாஜி மீண்டும் அமைச்சர் ஆவதற்கு உச்சநீதிமன்றம் எவ்வித தடையும் விதிக்கவில்லை என்பது குறிப்பிடத்தக்கது.