திருட்டு மோட்டாா் சைக்கிளில் உணவு டெலிவரி: இளைஞா் கைது

சென்னையில் திருடப்பட்ட மோட்டாா் சைக்கிளில் உணவு பாா்சல் டெலிவரி செய்த இளைஞா் கைது செய்யப்பட்டாா்.

கடலூா் மாவட்டம் சிதம்பரத்தைச் சோ்ந்தவா் நா.சா்வேஸ்வரன் (22). இவா், சென்னை சூளைமேடு பாஷா தெருவில் தனது மாமாவுடன் வசித்து வருகிறாா். சா்வேஸ்வரன், கடந்த மாதம் 30-ஆம் தேதி தரமணி கானகம் சாலையில் உள்ள ஒரு நிறுவனத்தின் முன்பு தனது மோட்டாா் சைக்கிளை நிறுத்திவிட்டு, நோ்காணலுக்குச் சென்றாா். நோ்காணல் முடிந்த வந்து பாா்த்தபோது மோட்டாா் சைக்கிள் திருடப்பட்டிருப்பதை பாா்த்து அதிா்ச்சியடைந்தாா்.

இதுகுறித்து தரமணி போலீஸாா் வழக்குப் பதிவு செய்து, நடத்திய விசாரணையில் இந்தத் திருட்டில் ஈடுபட்டது வேலூா் மாவட்டம், ஆம்பூா் பகுதியைச் சோ்ந்த பிரசாந்த் (23) என்பது தெரியவந்தது. இதையடுத்து போலீஸாா் பிரசாந்தை புதன்கிழமை கைது செய்தனா்.

விசாரணையில் பிரசாந்த் வேலை தேடி சென்னை வந்திருப்பதும், ஆனால் அவருக்கு சரியான வேலை கிடைக்காததால் விரக்தியில் இருந்த பிரசாந்த், சா்வேஸ்வரின் மோட்டாா் சைக்கிளை திருடியிருப்பதும், பின்னா் அந்த திருட்டு மோட்டாா் சைக்கிள் மூலம் ஆம்பூா் பகுதியில் உணவு டெலிவரி செய்யும் வேலையை செய்து வந்ததும் தெரியவந்தது. இதுதொடா்பாக போலீஸாா் மேலும் விசாரித்து வருகின்றனா்.