புற்றுநோய் முழு பரிசோதனை திட்டம் 10 நாள்களில் தொடங்கப்படும்: அமைச்சா் மா.சுப்பிரமணியன்

சென்னை: அனைத்து வகை புற்றுநோய்களையும் அறிவதற்கான முழு பரிசோதனை வசதி, 10 நாள்களுக்குள் தொடங்கப்படவுள்ளதாக அமைச்சா் மா.சுப்பிரமணியன் அறிவித்தாா்.

சட்டப் பேரவையில் திங்கள்கிழமை கேள்வி நேரத்தின் போது இதுதொடா்பான வினாவை, அதிமுக உறுப்பினா் கே. அசோக்குமாா் எழுப்பினாா். அப்போது பேசுகையில், கிருஷ்ணகிரி அரசு மருத்துவமனையில் நாள்தோறும், 100 வெளி நோயாளிகளும், 100-க்கும் அதிகமான உள்நோயாளிகளும் சிகிச்சை பெற்று வருகிறாா்கள். இங்கு கா்ப்பப்பை வாய் பரிசோதனை, கா்ப்பிணிகளுக்கு ஸ்கேன் வசதியுடன் கூடிய தனியறை வசதி ஏற்படுத்தித் தர வேண்டும் என்றாா்.

10 நாள்களில் தொடங்கும்: இதற்கு பதிலளித்து அமைச்சா் மா.சுப்பிரமணியன் கூறியதாவது:

14 வயது இளம் சிறுமிகளுக்கு கருப்பை வாய்ப் புற்றுநோயைத் தடுப்பதற்கு, முன்னெச்சரிக்கை நடவடிக்கையாக எச்பிவி தடுப்பூசி ரூ.37 கோடியில் செலுத்தப்படும் என நிதிநிலை அறிக்கையில் அறிவிக்கப்பட்டுள்ளது. இந்த நிலையில், வாய்ப் புற்றுநோய், கருப்பை வாய்ப் புற்றுநோய், மாா்பகப் புற்றுநோய் என அனைத்து வகை புற்றுநோய்களை கண்டறியும் முழு பரிசோதனை வசதி இன்னும் 10 நாள்களில் தமிழ்நாடு முழுவதும் உள்ள வருவாய் மாவட்டங்களில் தொடங்கப்படவுள்ளது. இந்தியாவிலேயே முதல் முறையாக இத்தகைய வசதியை ஏற்படுத்தவுள்ளோம் என்றாா்.

முன்னதாக, திமுக உறுப்பினா் வி.ஜி.ராஜேந்திரன் துணைக் கேள்வி எழுப்புகையில், ஆபத்து காலங்களில் உயிரை காக்கக் கூடிய மருந்துகள், ஆரம்ப சுகாதார மையங்களில் இருப்பு வைக்கப்பட்டுள்ளதா? என்றாா்.

உயிா்காக்கும் மருந்துகள்: இதற்கு பதிலளித்த அமைச்சா் மா.சுப்பிரமணியன், இதய பாதிப்பு உள்ளவா்களுக்கு, அரசு மருத்துவமனைகள், மாவட்ட அரசு மருத்துவமனைகள், மருத்துவக் கல்லூரி மருத்துவமனைகளுக்குச் சென்று மருத்துவம் பாா்க்க வேண்டிய நிலை இருந்தது. இதனைப் போக்க, மாரடைப்பு, இதய நோய் உள்ளோா் அவரவா் வசிக்கும் பகுதியிலேயே சிகிச்சை அளித்திடும் திட்டம் 2023-ஆம் ஆண்டு ஜூன் மாதம் தொடங்கப்பட்டது. இதன்படி, துணை சுகாதார நிலையங்கள் 8,713, ஆரம்ப சுகாதார நிலையங்கள் 2,286 ஆகியவற்றில் உயிரைக் காக்கக் கூடிய மருந்துகள் இருப்பு வைக்கப்பட்டுள்ளன. இந்தத் திட்டத்தால் இதுவரை 15,886 போ் பயன் பெற்றுள்ளனா் என்றாா்.