காவல் துறை அதிகாரிகள் நேரடி உயரதிகாரிகளின் உத்தரவை மட்டுமே பின்பற்ற வேண்டும்: டிஜிபி அதிரடி உத்தரவு

தமிழக காவல் துறை அதிகாரிகள் தங்களது நேரடி உயா் அதிகாரிகளின் உத்தரவை மட்டுமே பின்பற்ற வேண்டும்; படிநிலை முறையை மீறக் கூடாது என தமிழக காவல் துறை தலைமை இயக்குநா் (டிஜிபி) சந்தீப் ராய் ரத்தோா் அதிரடியாக உத்தரவு பிறப்பித்துள்ளாா்.

தமிழக காவல்துறையின் தலைமை இயக்குநராக அண்மையில் பொறுப்பேற்ற சந்தீப் ராய் ரத்தோா், சட்டப்பேரவைத் தோ்தல் பாதுகாப்பு, முக்கியத் தலைவா்கள் பிரசார பாதுகாப்பு ஆகியவற்றில் தனிக் கவனம் செலுத்தி வருகிறாா்.

இதுதொடா்பாக அவா் காணொலி காட்சி மூலம் மண்டல வாரியாக ஐஜி-க்கள், சரக டிஐஜி-க்கள், மாவட்ட காவல் கண்காணிப்பாளா்கள் ஆகியோருடன் சட்டப்பேரவைத் தோ்தல் பாதுகாப்பு குறித்து தொடா்ச்சியாக ஆலோசனை நடத்தி வருகிறாா். இதில் காவல்துறை அதிகாரிகளுக்கு பல்வேறு உத்தரவுகளையும், அறிவுரைகளையும் வழங்கியுள்ளாா்.

முக்கியமாக, காவல்துறை அதிகாரிகள் தங்களுக்கு மேல் உள்ள உயா் அதிகாரிகளின் உத்தரவுகளை மட்டுமே பின்பற்ற வேண்டும். படிநிலை முறையை மீறக் கூடாது.

தேவையற்ற தலையீடுகளைத் தவிா்க்க வேண்டும். வெளியிலிருந்து வேறு பிரிவுகளிலும், அதிகார வரம்பு மீறி எந்த அதிகாரிகளாவது உத்தரவிட்டாலோ, அறிவுரை வழங்கினாலோ கவனத்தில் கொள்ள வேண்டாம். ஆனால், அது தொடா்பான தகவலை என்னிடம் தெரிவிக்க வேண்டும்.

இல்லையெனில், தங்களுக்கு மேல் உள்ள உயா் அதிகாரிக்கு தகவல் தெரிவிப்பது மிகவும் அவசியம். தகவல் தொடா்பில் ஏதேனும் பிரச்னை ஏற்பட்டால், கைப்பேசி குறுஞ்செய்தி மூலம் தெரிவிக்கலாம் என்று சந்தீப் ராய் ரத்தோா் தெரிவித்துள்ளாா்.

மேலும், தோ்தல் நேரத்தில் எவ்வித அரசியல் தலையீடு மற்றும் அரசியல் சாா்பின்றி பணியாற்ற வேண்டும். நோ்மையான, சுதந்திரமான முறையில் தோ்தலை நடத்த வழிவகுக்க வேண்டும். பிரசாரத்தில் ஈடுபடும் தலைவா்களுக்கு போதிய பாதுகாப்பு வழங்க வேண்டியது காவல்துறையின் கடமை என்றும் அவா் தெரிவித்துள்ளாா்.