தாய்மாமன் திட்டத்தில் தங்க மோதிரம் தராததால் செவிலியர் மீது தாக்குதல்!

தாய்மாமன் தங்க மோதிரம் தரவில்லை என்ற ஆத்திரத்தில், செவிலியர் மற்றும் அவரது குடும்பத்தினர மண்வெட்டியால் தாக்கிய இளைஞரால் பரபரப்பு நிலவியது.

​தஞ்சாவூர் மாவட்டம், கும்பகோணம் அருகே உள்ள பம்பப்படையூர் சமத்துவபுரத்தைச் சேர்ந்தவர் அலமேலு(35). இவர் பட்டீஸ்வரம் அரசு ஆரம்ப சுகாதார நிலையத்தில் செவிலியராகப் பணியாற்றி வருகிறார். அதே பகுதியைச் சேர்ந்த மதனின் மனைவி வனிதா (26) என்பவருக்கு அரசு மருத்துவமனையில் கடந்த 16ஆம் தேதி இரண்டாவது குழந்தை பிறந்துள்ளது.

இந்த நிலையில் நேற்று மாலை மதன் மது போதையில் செவிலியர் அலமேலுவிடம் தாய்மாமன் தங்க மோதிரம் எனக்கு ஏன் தரவில்லை என கேட்டுத் தகராறில் ஈடுபட்டுள்ளார். அப்போது அங்கு இருந்த செவிலியர் அலமேலுவின் அண்ணன் சுமன் (43) சின்னம்மா சுஜாதா (50) ஆகியோர் தகராறில் ஈடுபட்ட மதனை தடுத்துள்ளனர்.

​ஒரு கட்டத்தில் ஆத்திரமடைந்த மதன், அங்கிருந்த மண்வெட்டியால் செவிலியர் அலமேலுவை தாக்கியுள்ளார். இதில் அருகில் இருந்த சுமன் மற்றும் சுஜாதா ஆகியோருக்கு கை மற்றும் தலையில் பலத்த காயம் ஏற்பட்டு உள்ளது. மேலும் செவிலியர் அலமேலுவிற்கு கை பகுதியில் உள்காயம் ஏற்பட்டுள்ளது.

காயமடைந்த மூவரும் தற்போது சிகிச்சைக்காக கும்பகோணம் அரசு தலைமை மருத்துவமனையில் அனுமதிக்கப்பட்டுள்ளனர். அங்கு அவர்களுக்குத் தீவிர சிகிச்சை அளிக்கப்பட்டு வருகிறது. ​இச்சம்பவம் குறித்து வழக்குப் பதிவு செய்துள்ள பட்டீஸ்வரம் காவல் நிலைய போலீசார் விசாரணை மேற்கொண்டு வருகிறனர்.