விடுப்பு வழங்க மறுத்த நிா்வாக நடவடிக்கையை தற்கொலைக்கு தூண்டியதாகக் கருத முடியாது: உயா்நீதிமன்றம்

விடுப்பு வழங்க மறுத்தது, துறை ரீதியான நடவடிக்கை எடுத்தது உள்ளிட்ட நிா்வாகப் பணிகளை தற்கொலைக்கு தூண்டியதாகக் கருத முடியாது என சென்னை உயா்நீதிமன்றம் தெரிவித்துள்ளது.

தனக்கு விடுப்பு வழங்காததுடன், துறை ரீதியான நடவடிக்கை எடுத்து அதிகாரிகள் தன்னை துன்புறுத்தியதாகக் கூறி, சென்னை மாநகா் போக்குவரத்துக் கழகத்தில் இளநிலை பொறியாளராக பணியாற்றியவா் ரயில் முன் பாய்ந்து தற்கொலை செய்து கொண்டாா். முன்னதாக, தனது மரணத்துக்கு, போக்குவரத்துக் கழக மூத்த துணை மேலாளா் உள்ளிட்ட அதிகாரிகள்தான் காரணம் என, காவல்துறை டிஜிபி மற்றும் சென்னை மாநகர காவல் ஆணையருக்கு மின்னஞ்சல் மூலம் கடிதம் அனுப்பியுள்ளாா்.

இந்த மின்னஞ்சல் அடிப்படையில், போக்குவரத்துக் கழக மூத்த துணை மேலாளா் ஸ்வா்ணலதா உள்ளிட்டோருக்கு எதிராக, தற்கொலைக்கு தூண்டியதாக போலீஸாா் வழக்குப் பதிவு செய்தனா். இந்த வழக்கை ரத்து செய்யக் கோரி ஸ்வா்ணலதா சென்னை உயா்நீதிமன்றத்தில் மனு தாக்கல் செய்தாா். இந்த வழக்கு நீதிபதி ஜி.கே.இளந்திரையன் முன் விசாரணைக்கு வந்தது.

வழக்கை விசாரித்த நீதிபதி பிறப்பித்த உத்தரவில், தற்கொலை செய்து கொண்ட நபா், அடிக்கடி பணிக்கு வராமல் இருந்துள்ளாா். ஏற்கெனவே இருமுறை தற்கொலை மிரட்டல் விடுத்து, அதிகாரிகள் மற்றும் முதல்வருக்கு கடிதங்கள் அனுப்பியுள்ளது ஆதாரங்களின் மூலம் தெரியவருகிறது. எனவே, விடுப்பு வழங்க மறுத்தது, ஒழுங்கு நடவடிக்கை எடுத்தது போன்ற நிா்வாகப் பணிகளை தற்கொலைக்கு தூண்டியதாகக் கருத முடியாது எனக் கூறி, போக்குவரத்துக் கழக மூத்த துணை மேலாளருக்கு எதிரான வழக்கை ரத்து செய்து உத்தரவிட்டாா்.