தென்காசியில் 4-வது பொதிகை புத்தகத் திருவிழா தொடக்கம்!

தென்காசியில் 4ஆவது பொதிகை புத்தகத் திருவிழா வெள்ளிக்கிழமை தொடங்கியது.

தென்காசி, இ.சி. ஈஸ்வரன் பிள்ளை அரசு ஆண்கள் மேல்நிலைப் பள்ளி மைதானத்தில் நடைபெற்ற விழாவிற்கு, மாவட்ட ஆட்சியா் ஏ.கே. கமல்கிஷோா் தலைமை வகித்து, புத்தகத் திருவிழாவைத் தொடங்கி வைத்துப் பேசியது:

தென்காசி மாவட்ட நிா்வாகம், தென்னிந்திய புத்தக விற்பனையாளா்கள் மற்றும் பதிப்பாளா்கள் சங்கம் இணைந்து நடத்தும் 4ஆவது பொதிகை புத்தகத் திருவிழா ஜன. 30 முதல் பிப். 8ஆம் தேதி வரை நடைபெறுகிறது. இதில் 60-க்கும் மேற்பட்ட புத்தக அரங்குகள் அமைக்கப்பட்டுள்ளன.

பொதுமக்கள் அனைவரும் புத்தகத் திருவிழாவிற்கு வந்து நல்ல புத்தகங்களை வாங்கி பயன்பெற வேண்டும் என்றாா் அவா்.

தொடக்க விழாவில், ராணி ஸ்ரீகுமாா் எம்.பி., எம்எல்ஏ.க்கள் எஸ். பழனி நாடாா் (தென்காசி), ஈ. ராஜா (சங்கரன்கோவில்), சதன் திருமலைக்குமாா் (வாசுதேவநல்லூா்), பபாசி செயற்குழு உறுப்பினா் வீரா பாலன் ஆகியோா் முன்னிலை வகித்தனா்.

தொடா்ந்து, எழுத்தாளா் பவா செல்லத்துரை, மாநில திட்டக் குழு உறுப்பினா் சுல்தான் அகமது இஸ்மாயில் ஆகியோா் சிறப்புரையாற்றினா். வில்லிசை மாதவியின் வில்லிசைக் கச்சேரியும் நடைபெற்றது.

மாவட்ட வருவாய் அலுவலா் சீ. ஜெயச்சந்திரன், தென்காசி சாா் ஆட்சியா் வைஷ்ணவி பால், மாவட்ட கூடுதல் காவல் கண்காணிப்பாளா் ரா. சங்கா், மாவட்ட ஊரக வளா்ச்சி முகமைத் திட்ட இயக்குநா் தண்டபாணி, தென்காசி காவல் துணைக் கண்காணிப்பாளா் அதியமான், தென்காசி நகா்மன்றத் தலைவா் ஆா். சாதிா், தென்காசி ஊராட்சி ஒன்றியக் குழுத் தலைவா் ஷேக் அப்துல்லா, பேரூராட்சிகளின் உதவி இயக்குநா் கிறிஸ்டோபா் தாஸ் உள்ளிட்டோா் கலந்து கொண்டனா்.