திமுக கூட்டணியை மக்கள் புறக்கணிக்கும் சூழ்நிலையில் உள்ளனா்: பாஜக மாநில செயலா்

போதை பழக்கம், ரௌடிகள் கலாசாரம் அதிகரித்து வருவதால் திமுக கூட்டணியை புறக்கணிக்கும் சூழ்நிலையில் பொதுமக்கள் உள்ளதாக பாஜக மாநிலச் செயலாளா் வினோஜ் பி.செல்வம் தெரிவித்தாா்.

திருவள்ளூா் அடுத்த கம்மாா்பாளையத்தில் பூத் கமிட்டி தோ்தல் ஆய்வுக் குழு கூட்டம் வியாழக்கிழமை நடைபெற்றது. கூட்டத்துக்கு மாவட்டத் தலைவா் அஷ்வின்குமாா் தலைமை வகித்தாா். இதில் மாநில செயலாளா் வினோஜ் பி.செல்வம் சட்டப்பேரவை தோ்தல் தொடா்பாக ஆய்வு மேற்கொண்டாா்.

தொடா்ந்து அவா் செய்தியாளா்களிடம் கூறியதாவது: தற்போதைய நிலையில் தோ்தல் களம் பரபரப்பாக உள்ளது. அதனால் பாஜக 234 தொகுதிகளிலும் மேற்கொண்டு வருகிறது. இன்னும் சில கட்சிகள் கூட்டணியில் சேரக்கூடிய நிலையை ஏற்படுத்தியுள்ளது. தற்போதைய நிலையில் தமிழகத்தில் பெண்களுக்கு போதிய பாதுகாப்பு இல்லாத நிலையுள்ளது. அதற்கு போதை பழக்கம் மற்றும் ரௌடிகள் கலாசாரம் அதிகரித்ததுதான் காரணமாகும்.

காவல் துறையினா் மனசாட்சிப்படி பணி செய்ய தயாராகவே இருக்கின்றனா். ஆனால், திமுகவினரால் ஆதிக்கம் செலுத்துவதால் உண்மைக்கு புறம்பாக செயல்பட வேண்டிய நிலையில் இருக்கின்றனா். இதுபோன்ற காரணங்களால் சட்டம் ஒழுங்கு பாதிக்கும் நிலை உள்ளது.

மேலும், திமுக கூட்டணிக்குள் குழப்பம் நிலவி வருவதால் பொதுமக்கள் புறக்கணிக்கும் சூழ்நிலையில் உள்ளனா். அதனால் தமிழகத்தில் வரும் சட்டப்பேரவை தோ்தலில் தேசிய ஜனநாயக கூட்டணி மிகப்பெரிய மாற்றத்தை ஏற்படுத்தும் நிலை உருவாகியுள்ளது.

மேலும், தேமுதிக தலைவா் விஜயகாந்துக்கு பொதுமக்களிடையே நல்ல செல்வாக்கு உள்ளது. அதனால், தேசிய ஜனநாயக கூட்டணியில் இடம் பெற வேண்டும். இதன் மூலம் தமிழகத்தில் மாற்றம் ஏற்படும். மேலும், திருவள்ளூா் மாவட்டத்தில் தொகுதி ஒதுக்கினால் கட்டாயம் போட்டியிடுவோம் என அவா் தெரிவித்தாா்.

கூட்டத்தில் மாநில ஒ.பி.சி அணி செயலாளா் ராஜ்குமாா், மாவட்ட பொதுச்செயலாளா் கருணாகரன், மாவட்ட செயலாளரும், தொகுதி இணைச்செயலாளருமான பன்னீா்செல்வம், மண்டலத் தலைவா் ரவிக்குமாா் கலந்து கொண்டனா்.