எரிவாயு சிலிண்டா்கள் திருட்டு: ஒருவா் கைது

திருத்தணி அருகே வீடுகள் முன்பு வைக்கப்பட்டிருந்த சமையல் எரிவாயு சிலிண்டா்களை திருடியவரை பொதுமக்கள் பிடித்து போலீஸாரிடம் ஒப்படைத்தனா்.

திருத்தணி ஒன்றியம், மாம்பாக்கம்சத்திரம் கிராமத்தில் 100-க்கும் மேற்பட்ட குடும்பத்தினா் வசித்து வருகின்றனா். இப்பகுதியில் கடந்த சில நாள்களாக வீடுகளின் முன்பு வைக்கப்பட்டிருந்த காலி சமையல் எரிவாயு சிலிண்டா்கள் தொடா்ந்து திருடுபோனதாகக் கூறப்படுகிறது.

இந்நிலையில், சனிக்கிழமை குருவய்யா என்பவா் வீட்டின் முன்பு காலி சமையல் எரிவாயு சிலிண்டரை வைத்திருந்தாா். அப்போது அங்கு வந்த மா்ம நபா் ஒருவா் சிலிண்டரைத் திருட முயன்றுள்ளாா். இதைக் கவனித்த கிராம மக்கள் ஒன்றுகூடி அந்த நபரைப் பிடித்து திருத்தணி காவல் நிலையத்தில் ஒப்படைத்தனா்.

இதைத்தொடா்ந்து போலீஸாா் நடத்திய விசாரணையில், பிடிபட்ட நபா் ஆா்.கே.பேட்டை ஒன்றியம், பெரியநாகபூண்டி கிராமத்தைச் சோ்ந்த உதயகுமாா் (34) என்பது தெரியவந்தது.

மேலும், மாம்பாக்கம்சத்திரம் பகுதியில் காலி சமையல் எரிவாயு சிலிண்டா்களைத் திருடிச் சென்றதையும் அவா் ஒப்புக்கொண்டதாகக் கூறப்படுகிறது. இதையடுத்து திருத்தணி போலீஸாா் வழக்குப் பதிவு செய்து உதயகுமாரைக் கைது செய்தனா்.