தமிழ் எழுத்துகளுடன் ஸ்கூட்டி பெப் பிளஸ் புதிய வடிவம் அறிமுகம்

டிவிஎஸ் மோட்டாா் நிறுவனத்தின் தயாரிப்பான ஸ்கூட்டி பெப் பிளஸ் வாகனத்தில் தமிழ் எழுத்துகள் இடம் பெறும் வடிவமைப்புடன் புதிய மாடல் அறிமுகம் செய்யப்பட்டுள்ளது.

கூடுதல் செயல் திறனுடன் கூடுதல் மைலேஜையும் இந்த மாடல் அளிக்கிறது என்று அந்நிறுவனம் தெரிவித்துள்ளது. இது குறித்து நிறுவனம் வெளியிட்ட செய்திக்குறிப்பில் தெரிவிக்கப்பட்டிருப்பதாவது:

இளைஞா்களின் முதல் விருப்பமான வாகனம் என்னும் வகையில், ஸ்கூட்டி பெப் பிளஸ் ‘முதல் காதல்’ பதிப்பை அறிமுகம் செய்துள்ளோம். முதல் முறையாக தமிழ் எழுத்துகளில் வாகனத்தின் மாடல் பெயரை வடிவமைத்து உருவாக்கியுள்ளோம். இவ்வாறு தமிழில் மாடலின் சின்னத்தை வடிவமைத்திருப்பது இரு சக்கர வாகனத் தொழில்துறையில் இதுவே முதல் முறையாகும். மேலும் இந்த மாடல், புதிய அழகிய வண்ணக்கலவைகளுடன் வருகிறது.

இதன் இ.டி.எஃப்ஐ இகோ திரஸ்ட் என்ஜின் வேகம் அளிப்பதுடன், நீண்ட கால உழைப்பு, தங்கு தடையில்லாத செயல்பாடு மற்றும் சொகுசான சவாரியை உறுதி செய்கிறது. இந்தப் புதிய மாடல் கூடுதல் செயல் திறன் அளிப்பதுடன் 15 சதவீதம் கூடுதல் மைலேஜ் அளிக்கிறது.

டிவிஎஸ் ஸ்கூட்டி பெப் பிளஸ் ‘முதல் காதல்’ பதிப்பின் விற்பனையக விலை ரூ.56,085 ஆகும். இந்த வடிவமைப்பில் தயாரித்த ஸ்கூட்டி பெப்+ குறுகிய காலத்துக்கு மட்டுமே விற்பனையில் இருக்கும்.

ஏற்கெனவே சந்தையில் உள்ள ஸ்கூட்டி பெப் பிளஸ் மாடல் ரூ.54,475 விலையில் விற்பனையாகிறது என்று நிறுவனம் வெளியிட்ட செய்திக்குறிப்பில் தெரிவிக்கப்பட்டுள்ளது.