பங்குச் சந்தை சரிவு: சென்செக்ஸ், நிஃப்டி 1 சதவீதத்திற்கும் அதிகமாக வீழ்ச்சி!

மும்பை: உலகளாவிய பங்குச் சந்தையில் நிலவிய மந்தநிலை தொடர்ந்து உள்ளூர் பங்குச் சந்தையில் எச்.டி.எஃப்.சி. வங்கி மற்றும் தகவல் தொழில்நுட்ப நிறுவனங்களின் பங்குகள் பலவீனமடைந்ததைத் தொடர்ந்து, இன்றைய வர்த்தகத்தில், பங்குச் சந்தை குறியீடுகளான சென்செக்ஸ் மற்றும் நிஃப்டி தலா 1 சதவீதத்திற்கும் அதிகமாக சரிந்து நிறைவடைந்தன.

தொடக்க வர்த்தகத்தில், சென்செக்ஸ் 1,011.56 புள்ளிகள் சரிந்து 76,082.51 புள்ளிகள் வரை சென்றது. வர்த்தக முடிவில், 30 பங்குகளைக் கொண்ட சென்செக்ஸ் 893.39 புள்ளிகள் சரிந்து 76,200.68 புள்ளிகளாகவும், 50 பங்குகளைக் கொண்ட நிஃப்டி 278.80 புள்ளிகள் சரிந்து 23,824.10 புள்ளிகளாக நிறைவடைந்தன.

கடந்த வாரம், ஐந்து வர்த்தக அமர்வுகளில் 4 அமர்வுகள் ஏற்றம் கண்டன.

சென்செக்ஸில் இன்ஃபோசிஸ் மற்றும் டாடா கன்சல்டன்சி சர்வீசஸ் ஆகியவை தலா 3 சதவீதத்திற்கும் அதிகமாக சரிந்தன. பாரத் எலக்ட்ரானிக்ஸ், டாடா ஸ்டீல், அதானி போர்ட்ஸ், எச்சிஎல் டெக் மற்றும் ஸ்டேட் பேங்க் ஆஃப் இந்தியா உள்ளிட்ட பங்குகள் சரிந்தன மறுபுறம் பவர் கிரிட், ஆக்சிஸ் வங்கி, சன் பார்மா மற்றும் மாருதி சுஸுகி ஆகிய பங்குகள் உயர்ந்தன.

நிஃப்டி ஸ்மால்கேப் மற்றும் மிட்கேப் 100 குறியீடுகள் தலா 0.6 சதவீதம் மற்றும் 0.75 சதவீதம் சரிந்தன.

தரவுகளின் அடிப்படையில், நேற்று (திங்கள்கிழமை) வெளிநாட்டு நிறுவன முதலீட்டாளர்கள் ரூ. 635.91 கோடி மதிப்பிலான பங்குகளை விற்பனை செய்துள்ளனர்.

ஆசிய சந்தைகளில், தென் கொரியாவின் கோஸ்பி, ஜப்பானின் நிக்கி 225, ஷாங்காயின் எஸ்எஸ்இ காம்போசிட் குறியீடு மற்றும் ஹாங்காங்கின் ஹேங் செங் குறியீடுகள் கடும் சரிவுடன் நிறைவடைந்தன. இதில் கோஸ்பி குறியீடு மற்றும் 10 சதவீதம் சரிந்தன.

ஐரோப்பிய சந்தைகளும் சரிவுடனேயே இன்று வர்த்தகமானது.

தொழில்நுட்பத் துறை சார்ந்த பங்குகள் பெருமளவில் விற்கப்பட்டதால், இந்தியப் பங்குச் சந்தை சமீபத்திய ஏற்றப் பாதையிலிருந்து விலகி, உலகளாவிய சந்தைகளைப் போலவே கடும் சரிவைச் சந்தித்தன. அதே வேளயில், 2 சதவீதத்திற்கும் அதிகமாக சரிந்த தகவல் தொழில்நுட்பத் துறை இந்த வீழ்ச்சிக்கு முக்கிய காரணமாக அமைந்தது.

உலகளாவிய பிரெண்ட் கச்சா எண்ணெய் விலை 0.67 சதவீதம் சரிந்து, பீப்பாய் ஒன்றுக்கு 77.46 டாலராக உள்ளது.