சிக்கிமில் மீண்டும் ஆட்சியைப் பிடிக்கிறார் பிரேம்சிங் தமாங்!

முதல்வர் பிரேம் சிங் தமாங் தலைமையிலான சிக்கிம் கிராந்திகாரி மோர்ச்சா கட்சி (எஸ்கேஎம்) 32 உறுப்பினர்களைக் கொண்ட சட்டப்பேரவையில் 31 இடங்களை வென்று வரலாறு படைத்து மலைப்பிரதேசமான சிக்கிமில் இரண்டாவது முறையாக ஆட்சியைத் தக்க வைத்துக் கொண்டது.

மற்றொரு புறம் இந்தியாவின் நீண்ட காலம் முதல்வராக இருந்தவரும், சிக்கிம் ஜனநாயக முன்னணி (எஸ்டிஎஃப்) கட்சி தலைவரும், முன்னாள் முதல்வருமான பவன் குமார் சாம்லிங், அவர் போட்டியிட்ட இரண்டு இடங்களிலும் தோல்வியைத் தழுவியுள்ளார். சிக்கிம் ஜனநாயக முன்னணி ஒரு இடத்தில் மட்டுமே வெற்றி பெற முடிந்தது. ஷியாரி தொகுதியில் போட்டியிட்ட டென்சிங் நோர்பு லாம்தா மட்டும் ஒரேயொரு இடத்தில் வெற்றி பெற்றார்.

இரண்டு இடங்களிலும் வெற்றி பெற்ற முதல்வர் பிரேம் சிங் தமாங்

முதல்வர் பிரேம்சிங் தமாங் ரெனாக் தொகுதியில் வெற்றி பெற்றார். மேலும் அவர் தனது இரண்டாவது தொகுதியான சோரெங் சாகுங் தொகுதியிலும் வெற்றி பெற்றார். தமாங் 7,044 வாக்குகள் வித்தியாசத்தில் எஸ்டிஎஃப்பின் சோம் நாத் பௌடியாலை தோற்கடித்து ரெனாக் சட்டப் பேரவைத் தொகுதியை கைப்பற்றினார். பிரேம்சிங் தமாங் 10,094 வாக்குகளையும், சிக்கிம் ஜனநாயக முன்னணியின் சோம்நாத்துக்கு 3,050 வாக்குகளும் கிடைத்தன.

ஒரு இடமாக குறைந்த சிக்கிம் ஜனநாயக முன்னணி கட்சி

2019 ஆம் ஆண்டு வரை 25 ஆண்டுகள் தொடர்ந்து மாநிலத்தில் ஆட்சி செய்த சிக்கிம் ஜனநாயக முன்னணி, வெறும் ஒரு இடத்தை மட்டுமே கைப்பற்றியது. பவன் குமார் சாம்லிங் தான் போட்டியிட்ட போக்லோக் கம்ராங், நாம்செய்பங் ஆகிய 2 சட்டப்பேரவைத் தொகுதிகளையும் இழந்தார்.

போக்லோக் கம்ராங் சட்டபேரவைத் தொகுதியில் சிக்கிம் கிராந்திகாரி மோர்ச்சாவின் போஜ் ராஜ் ராய் 8,037 வாக்குகளும், பவன் குமார் சாம்லிங் 4,974 வாக்குகளும் பெற்றனர்.

சிக்கிம் ஜனநாயக முன்னணியின் தலைவர் நாம்செய்பங் சட்டப்பேரவைத் தொகுதியில் சிக்கிம் கிராந்திக்காரி மோர்ச்சாவின் ராஜு பாஸ்நெட்டிடமும் 2,256 வாக்குகள் வித்தியாசத்தில் தோல்வியடைந்தார்.

தோல்வியடைந்த பைச்சுங் பூட்டியா

முன்னாள் இந்திய கால்பந்து அணியின் கேப்டனும், எஸ்டிஎஃப் வேட்பாளருமான பைச்சுங் பூட்டியா, பார்ஃபுங் சட்டப்பேரவைத் தொகுதியில் எச்கேஎம் தலைவர் ரிக்சல் டோர்ஜி பூட்டியாவிடம் 4,346 வாக்குகள் வித்தியாசத்தில் தோல்வியைத் தழுவினார்.

வெற்றியை பதிவு செய்த வேட்பாளர்கள்

லாச்சென் மங்கன் சட்டப்பேரவைத் தொகுதியில் எச்கேஎம்மின் சம்துப் லெப்சா 851 வாக்குகள் வித்தியாசத்தில் எஸ்டிஎஃப்பின் ஹிஷே லச்சுங்பாவை தோற்கடித்து வெற்றி பெற்றார்.

சுஜாசென் தொகுதியில் எஸ்கேஎம் வேட்பாளர் பூரன் குமார் குருங் 3,334 வாக்குகள் வித்தியாசத்தில் மணிகுமார் குருங்கை தோற்கடித்து வெற்றி பெற்றார்.

எச்கேஎம்மின் பின்ட்சோ நம்கியால் லெப்சா, ஜோன்கு சட்டப்பேரவைத் தொகுதியில் 5,007 வாக்குகள் வித்தியாசத்தில் எச்டிஎஃப்பின் சோனம் கியாட்சோ லெப்சாவை தோற்கடித்து வெற்றி பெற்றார்.

சிக்கிம் பாஜக தலைவர் டில்லி ராம் தாபா, அப்பர் பர்துக் சட்டப்பேரவைத் தொகுதியில் எஸ்கேஎம் போட்டியாளரான கலா ராயிடம் 2,668 வாக்குகள் வித்தியாசத்தில் தோல்வியடைந்தார்.