பகுதி - 827

பரவைக்கு எத்தனை விசைதூது... (சுந்தர மூர்த்தி நாயனாருக்காக) பரவை நாச்சியாரிடம் எத்தனைமுறை வேண்டுமானாலும் தூது சென்று,

பகரற்கு உற்றவர் என மாண்... பேசுவதற்குத் தயாராய் இருந்தவர் இவர் என்னும் பெருமையை உடைய (தந்தையான சிவபெருமானுடைய)

உன் மரபுக்கு உச்சித ப்ரபுவாக... உன் மரபுக்கு ஏற்ற பெரியோனாக விளங்கும் வண்ணமாக,

வரம் மெத்தத் தர வருவாயே... எனக்கு நிறைய வரங்களை அளிப்பதற்காக என் முன்னே எழுந்தருள வேண்டும்.

கரடக் கற்பகன் இளையோனே... மதம் பெருகும் மத்தகத்தை உடைய கற்பக விநாயகனுடைய இளையவனே!

கலைவிற் கட்குற மகள்கேள்வா... மானைப் போன்றதும் ஒளிவிடுவதுமான கண்களை உடைய குறமகளுடைய கேள்வனே!

அரனுக்கு உற்றது புகல்வோனே... சிவபெருமானுக்கு பிரணவத்தின் பொருளை உபதேசித்தவனே!

அயனைக் குட்டிய பெருமாளே.... பிரமனைக் குட்டிய பெருமாளே!

சுருக்க உரை

மதம் பெருகும் மத்தகத்தை உடைய கற்பக விநாயகனுக்கு இளையவனே! மானைப்போன்றதும் ஒளிர்வதுமான கண்களையுடைய குறமகள் வள்ளியின் மணாளனே! பிரணவத்தின் பொருளை சிவபெருமானுக்கு உபதேசித்தவனே! பிரமனைக் குட்டிய பெருமாளே!

சுந்தர மூர்த்தி சுவாமிகளுக்காக பரவை நாச்சியாரிடம் எத்தனைமுறை வேண்டுமானாலும் தூது நடக்கத் தயாராக இருந்தவர் என்னும் பெருமையை உடைய சிவபெருமானின் குலத்துக்கு ஏற்ற பெரியோனாக விளங்கும் நீ, அடியேனுக்குப் பற்பல வரங்களைத் தருவதற்காக என் முன்னே எழுந்தருள வேண்டும்.