79. நீலமாமணி கண்டத்தர் - பாடல் 4

பாடல் 4: 

    நீடு காடு இடமாய் நின்ற பேய்க்கணம்
    கூடு பூதம் குழுமி நின்று ஆர்க்கவே
    ஆடினார் அழகாகிய நான்மறை
    பாடினார் அவர் பாலைத் துறையரே

விளக்கம்:

நீடு காடு=நீண்ட காடு: ஆர்க்க=ஆரவாரிக்க: 

பொழிப்புரை:
நீண்ட காட்டினைத் தாங்கள் வாழும் இடமாகக் கொண்ட பேய்க்கணங்களும், கூடி நின்ற பூத கணங்களும், மிகுந்த ஆரவாரத்துடன் ஆட, அவைகளின் ஆடலுக்கு இணைந்து ஆடும் சிவபெருமான். அழகான நான்மறைகளை பாடியவாறே ஆடுகின்றார். அத்தகைய திறமை வாய்ந்த அவர் பாலைத்துறை தலத்தில் உறைகின்றார்.