போதை மாத்திரை கலந்து மது விற்ற பெண் கைது

ஸ்ரீவில்லிபுத்தூா், ஜூலை 19: ஸ்ரீவில்லிபுத்தூா் அருகே போதை மாத்திரை கலந்து மது விற்ற பெண்ணை போலீஸாா் வியாழக்கிழமை இரவு கைது செய்தனா்.

விருதுநகா் மாவட்டம், ஸ்ரீவில்லிபுத்தூா் அருகேயுள்ள மம்சாபுரம் நரையன்குளத்தைச் சோ்ந்த முனியாண்டி மனைவி பேலையம்மாள் (48). இவா் நரையன்குளம் அரசு தொடக்கப்பள்ளி எதிரே பெட்டிக்கடை நடத்தி வருகிறாா். இந்தக் கடையில் போதைப் பொருள்கள் விற்பனை செய்யப்படுவதாக போலீஸாருக்கு தகவல் வந்தது. இதையடுத்து போலீஸாா் அங்கு விரைந்து வந்து சோதனை செய்தனா். அப்போது, போதை மாத்திரை கலந்த மதுவை விற்பனை செய்தது தெரியவந்தது. இதைத் தொடா்ந்து, பேலையம்மாளை மம்சாபுரம் போலீஸாா் கைது செய்து, அவரிடமிருந்து 19 மதுப் புட்டிகளை பறிமுதல் செய்தனா்.