சமையல்... சமையல்! - நலம் தரும் சூப் வகைகள் 

மணத்தக்காளி சூப்

தேவையான பொருட்கள்:

மணத்தக்காளி கீரை - 1 கட்டு
பாசிப் பருப்பு  -100 கிராம்
தக்காளி - 1
வெங்காயம் - 1
பூண்டு - 5 பல்
மிளகு - சிறிது
சீரகம்  - சிறிது
கடுகு - சிறிது
கறிவேப்பிலை  - சிறிது
எண்ணெய் - சிறிது
உப்பு - தேவைக்கேற்ப

செய்முறை: வாணலியில் எண்ணெய் விட்டு கடுகு, கறிவேப்பிலை வெங்காயம் போட்டு தாளித்து அதனுடன் பூண்டு, தக்காளி சேர்த்து நன்கு வதக்கவும். பின் கீரையை நன்கு கழுவி பொடியாக நறுக்கி வாணலியில் சேர்த்து பின் மிளகு, சீரகம் சேர்த்து தண்ணீர் விட்டு கொதிக்க வைத்து வடிகட்டி அரைத்துக் கொள்ளவும். பாசிப்பயிறை வேகவைத்து மசித்து  கீரையுடன் சேர்த்து கொதிக்க விட்டு உப்பு சேர்த்து பரிமாறவும். மணத்தக்காளி சூப் ரெடி.

முருங்கைக் கீரை சூப்

தேவையான பொருட்கள்:

முருங்கைக் கீரை - 2 கிண்ணம்
சின்ன வெங்காயம் - 10
பூண்டு பல் - 4 பெரியது
தக்காளி - 2
ஜீரகம்  - அரை தேக்கரண்டி
மிளகு - அரை தேக்கரண்டி
உப்பு - சுவைக்கேற்ப
தண்ணீர் - 5 கிண்ணம்

செய்முறை:  மேலே சொன்ன பொருள்கள் அனைத்தையும் ஒன்றாக குக்கரில் போட்டு மூடி வேக வைத்து எடுக்கவும்.  அதன் பின்னர் எடுத்து  வடிகட்டி லேசான சூடுடன் குடிக்க அதுவும் மழை சமயம் தொண்டைக்கு இதமாக இருக்கும். முருங்கைக் கீரை  சூப் தயார்.

மிளகு சூப்

தேவையானவை: 
துவரம்பருப்பு - ஒரு  கிண்ணம்
வெங்காயம் - ஒன்று
உருளைக்கிழங்கு - ஒன்று (சதுரமாக நறுக்கி கொள்ளவும்)
ஆப்பிள் - அரை துண்டு (சதுரமாக வெட்டவும்)
தேங்காய்த் துருவல் - அரை கப் (பால் எடுக்கவும்)
பூண்டு - 3 பல்
கறிவேப்பிலை - சிறிதளவு
மிளகுத்தூள் - காரத்துக்கேற்ப
எலுமிச்சைச் சாறு - அரைத் தேக்கரண்டி
வெண்ணெய் - தலா 2 தேக்கரண்டி 
உப்பு - தேவையான அளவு.
மசாலாவுக்கு: பட்டை, கிராம்பு, ஏலக்காய் - தலா ஒன்று
மிளகு - 2  தேக்கரண்டி 
கொத்துமல்லி - 3 தேக்கரண்டி
மஞ்சள்  -  1 துண்டு
மிளகாய் வற்றல் - 10
சோம்பு - அரை  தேக்கரண்டி

செய்முறை: மசாலாவுக்கு கொடுத்துள்ளவற்றை தனித் தனியாக வறுத்து ஒன்று சேர்த்து பொடித்துக் கொள்ளவும். குக்கரில் வெண்ணெய்யைச்  சேர்த்து, சூடானதும் கறிவேப்பிலையைப் போட்டு, பிறகு நறுக்கிய வெங்காயம், பூண்டு சேர்த்து வதக்கவும். நறுக்கிய ஆப்பிள், உருளைக்கிழங்கு சேர்த்து மேலும் வதக்கவும். இதனுடன் 2 டேபிள்ஸ்பூன் மசாலா, துவரம்பருப்பு சேர்த்து தேவையான அளவு தண்ணீர் ஊற்றி வேக வைக்கவும். வெந்தவுடன் மூடியைத் திறந்து தேங்காய்ப் பால், உப்பு, மிளகுத்தூள் சேர்த்து கொதிக்க வைத்து, ஆறியதும் வடிகட்டி, எலுமிச்சைச் சாறு சேர்த்துப் பரிமாறவும். மிளகு சூப் தயார்.

பூண்டு சூப்

தேவையானவை: 
முழுப்பூண்டு - 2 (தோலுரிக்கவும்),
வெங்காயம் - ஒன்று (பொடியாக நறுக்கவும்)
தண்ணீர் - அரை லிட்டர்
மைதா -  ஒரு தேக்கரண்டி
பால் - ஒரு கிண்ணம்
கிரீம் அல்லது கெட்டித் தயிர் - சிறிதளவு
ஆலிவ் எண்ணெய் - ஒரு தேக்கரண்டி
மிளகுத் தூள், உப்பு - தேவையான அளவு.

செய்முறை: வாணலியில் எண்ணெய்யை சூடாக்கி, உரித்த பூண்டு சேர்த்து நன்கு வறுக்கவும். இதில் சிறிது எடுத்து தனியே வைக்கவும். நறுக்கிய வெங்காயத்தை சேர்த்து வதக்கவும். மைதாவையும் சேர்த்து வறுத்து, அடுப்பை மிதமான தீயில் வைத்து பாலை கொஞ்சம் கொஞ்சமாக ஊற்றி கட்டி இல்லாமல் கிளறி, தண்ணீரை சேர்த்து கொதிக்கவிடவும். பூண்டு நன்கு வெந்தவுடன் உப்பு, மிளகுத்தூள் சேர்த்து கொதிக்கவிட்டு இறக்கி வடிகட்டி, தனியாக எடுத்து வைத்த வறுத்த பூண்டு, கிரீம் (அ) தயிர் சேர்த்துப் பரிமாறவும். பூண்டு சூப் ரெடி.

ப்ராக்கோலி சூப் 

தேவையானவை:
ப்ராக்கோலி - ஒரு கிண்ணம்
காய்கறி வேக வைத்த தண்ணீர்  - 4 கிண்ணம்
வெண்ணெய், மைதா - தலா  1 தேக்கரண்டி
வெங்காயம் - ஒன்று (நறுக்கிக் கொள்ளவும்)
பிரிஞ்சி  இலை - சிறிதளவு
கிரீம் -  1 தேக்கரண்டி
கொத்துமல்லி, துருவிய சீஸ் - சிறிதளவு
மிளகுத்தூள், உப்பு - தேவையான அளவு

செய்முறை: வாணலியில் வெண்ணெய்யைச் சேர்த்து,  உருகியதும் நறுக்கிய வெங்காயத்தை போட்டு வதக்கி, உப்பு, மிளகுத்தூள் சேர்த்து மேலும் வதக்கவும். இதனுடன் பிரிஞ்சி இலை சேர்த்து, நன்கு வதங்கியவுடன் மைதா சேர்த்து வறுக்கவும்.  பச்சை வாசனைப்  போனதும் காய்கறி வேக வைத்த தண்ணீர் சேர்த்து கட்டியில்லாமல் கிளறிக் கொண்டு இருக்கவும். பிறகு ப்ராக்கோலி சேர்த்து வேகவிடவும். மிகவும் கெட்டியாக இருந்தால் சிறிது தண்ணீர் ஊற்றவும். வெந்தவுடன் ஆற வைத்து, மிக்ஸியில் ஒரு சுற்று சுற்றி எடுத்து, மறுபடியும் அடுப்பில் வைத்து கொதி வந்தவுடன் இறக்கி... கிரீம், துருவிய சீஸ், கொத்துமல்லி சேர்த்து  பரிமாறவும். ப்ராக் கோலி சூப் தயார்.