வடித்த சாதம் வெண்மையாக இருக்க...

இட்லிக்கு உளுந்து அரைக்கும் போது  ஃபிரிட்ஜ் வாட்டர் ஊத்தி அரைத்தால் மாவு நல்லா பொங்கி வரும்.

வெண்பொங்கல் செய்யும்போது,  மிளகை லேசா வறுத்துபொடித்து சேர்த்தால்  சுவை கூடுதலாக இருக்கும்.  உடலுக்கு ஆரோக்கியம். 

பிஸ்கட்டுகள் நமத்துப் போகாமல் இருக்க, மெல்லிய துணியில் சிறிது சர்க்கரையை மூட்டை போல் கட்டி, பிஸ்கட் டப்பாவில் போட்டு வைக்கலாம்.

வெயில் காலத்தில் பால் திரிந்து போகாமல் இருக்க, பாலுடன் நான்கைந்து நெல் விதைகளைப்  போட்டு வைக்கலாம்.

வெங்காயம் நறுக்குவதற்கு முன் கத்தியை லேசாக சூடு செய்து விட்டால், கண் எரிச்சல் ஏற்படாது.

பூண்டை வெயிலில் வைத்து எடுத்தால், தோலை எளிதில் உரிக்கலாம்.

சாம்பார், வற்றல் குழம்பு ஆகியவற்றில் காரம் அதிகமாகிவிட்டால், நல்லெண்ணெய்யை ஊற்றி கொஞ்சம் கொதிக்க விடுங்கள். காரம் குறைந்து விடும், குழம்பின் வாசனையும்  ருசியும் நன்றாக இருக்கும். 

குழம்பில் புளி அதிகமாகி விட்டால், சிறு உருண்டை வெல்லம் சேர்த்தால் புளிப்பு சுவை உடனே சரியாகி விடும்.

சாம்பாரில் சில சமயம் பருப்பு சேராமல் நீர்க்க இருக்கும். அப்போது துவரம்பருப்பு சிறிது எடுத்து மிக்சியில் அரைத்து சாம்பாரில் சேர்த்து நன்கு கொதிக்க விடுங்கள். சாம்பார் கெட்டியாகிவிடும். அரிசி மாவு கரைத்து விடுவதை விட, இவ்வாறு செய்வது சாம்பாரின் ருசியை அதிகரிக்கும்.

சாதம் வேகாமல் நறுக்கரிசியாக இருந்தால், சாதத்தின் மேல் சிறிது தண்ணீரை தெளித்து குக்கரில் வைக்கவும். ஆவி வந்ததும், வெயிட் போட்டு உடன் அணைத்து விடவும். சத்தம் அடங்கியவுடன் குக்கரை திறந்தால் சாதம் பூவாக வெந்து இருக்கும்.

சில சமயங்களில் தண்ணீர் நன்றாக இல்லாவிட்டால், சாதம் நிறம் சற்று மங்கலாக இருக்கும். அப்போது அரிசி களைந்து குக்கரில் வைக்கும் போது சில சொட்டு எலுமிச்சை சாறு விட்டு வைத்தால், சாதம் பொல பொலவென்றும் வெண்மையாகவும் இருக்கும்.