சிறுவர் பாடல்: தாய் மொழியே! தமிழ் மொழியே!

தாய் மொழியே எங்கள் தமிழ் மொழியே

தாலாட்டுப் பாடிய தாய் மொழியே

வாய்மொழி பேசியே வளர்த்தவள் தாய்

வாழ்வெலாம் தமிழ் உணர்த்தியவள் தாய்!

வள்ளுவர் இளங்கோ கம்பரென

வாழ்ந்தவர் காவியம் படைத்த மொழி

துள்ளிடும் இசை நயம் நிறைந்த மொழி

தூய நல் இலக்கணம் அமைந்த மொழி!

ஆண்டாள் ஒளவையார் பெண்புலவர்

அன்புடன் பேணிய எம்மொழியே

அணையா விளக்கே அகிலமெலாம்

சுடர்விடும் தமிழே செம்மொழியே!

நாவையே அசைத்துப் பேச வைக்கும்

நம் தமிழ் மொழியே செந்தமிழே

பாவையே எங்கள் தென்மொழியே

பாடுவோம் வாழிய செம்மொழியே!