கையெழுத்து

 குண்டுகுண்டாக முத்துமுத்தாக
 கோணல்இல்லாமல் எழுதிடணும்!
 கோணல்மாணலாய் எழுதினால் தேர்வில்
 குறைந்திடும் மதிப்பெண் உணர்ந்திடணும்!
 
 கண்டதும் நெஞ்சம் மகிழ்ந்து படிப்பார்
 கையெழுத்து அழகை மிகரசிப்பார்
 கண்களில் ஒற்றிக் கொள்ளலாம் போல்நம்
 கையெழுத்து இருந்தால் மிகவியப்பார்!
 
 மண்டுகள் கோடி கிறுக்குதல் போன்றே
 மடித்தும் நெளித்தும் எழுதிடுவார்
 மணிமணியாக எழுதினால் படிப்பவர்
 மகிழ்வுடன் ரசிப்பார்! தொழுதிடுவார்!
 
 தலைஎழுத்தே போல் கையெழுத்தும் தான்
 சரியாய் அழகாய் அமைந்திடணும்
 தட்டச்சு போலப் பளிச்சிடும் வண்ணம்
 தம்கை எழுதியே பழகிடணும்!
 
 அவரவர் முகத்தை அழகுசெய் தல்போல்
 அனுதினம் கையெழுத்து இடவேண்டும்
 அவசரம் என்றே கிறுக்கியே எழுதும்
 அதுமிகத் தவறு விடவேண்டும்!