அங்கிள் ஆன்டெனா

கேள்வி: பூமி இவ்வளவு எடை என்று கணக்கிட்டுச் சொல்கிறார்கள் விஞ்ஞானிகள், அது போல வானத்துக்கு எவ்வளவு எடை என்று கணக்கிட்டிருக்கிறார்களா?

பதில்: விஞ்ஞானிகள் சும்மா இருப்பார்களா? கில்லாடிகளாச்சே!  அதையும் கணக்கிட்டிருக்கிறார்கள். பூமியின்  மொத்தப் பரப்பளவு 197 மில்லியன் சதுர மைல்கள் என்று கணக்கிட்டிருக்கிறார்கள். இந்த 197 மில்லியனை நான்கு பில்லியனால் பெருக்கினால் பூமியின் மொத்தப் பரப்பளவு சதுர அங்குலங்களில் கிடைத்து விடும். ஆனால் அந்த எண்ணை நீங்கள்தான் கணக்கிட்டுக் கொள்ள வேண்டும். முடிந்தால் பாருங்கள், இல்லாவிட்டால் பரவாயில்லை.

வான்வொளியின் அழுத்தம் 1 சதுர அங்குலத்துக்கு  6.6 கிலோ என்று கணக்கிட்டிருக்கிறார்கள். இதையும் பூமியின் மொத்தப் பரப்பளவையும் வைத்துக் கணக்கிட்டால் வானத்தின் எடை 5.2 மில்லியன் பில்லியன் மெட்ரிக் டன் ஆகும். இதை இங்கிலாந்திலுள்ள விஞ்ஞானக் கழகம் ஒன்று மிக எளிதாகச் சொல்லியிருக்கிறது. அதன்படி இந்தியாவிலுள்ள நன்கு வளர்ச்சி பெற்ற 570,000,000,000,000 யானைகளின் மொத்த எடைதான் நமது வானத்தின் எடை என்கிறார்கள். அப்பாடி, மூச்சு முட்டுகிறதா? 

சரி, இந்தக் கணக்கெல்லாம் இருக்கட்டும். இவ்வளவு பெரிய அழுத்தத்தை நாம் எப்படி உணராமல் இருக்கிறோம் என்று யோசித்தீர்களா?  நாம் குழந்தைகளாக இருக்கும்போதிலிருந்தே இதற்குப் பழகிப் பழகி, அழுத்தத்தை உணராத நிலைக்கு வந்து விட்டோம்.  நம்மை திடீரென்று காற்று கொஞ்சமாக இருக்கும் கிரகம் ஒன்றில் கொண்டு போய் விட்டால்தான் இந்த அழுத்தத்தை நாம் உணருவோமாம்!