மொபைல் திரையரங்கம்

கரோனா காலத்துக்குப் பின் சினிமா காட்டக்கூடிய தளங்கள் மாறியிருக்கின்றன. ஆனாலும், சின்ன படங்கள் முதல் பெரிய படங்கள் வரை அதன் தயாரிப்பாளர்கள் படத்தை ரிலீஸ் செய்ய முடியாமல் தவித்து வருகிறார்கள்.

இந்த நிலையில் மாற்றுத் தளமாக வருகிறது மொபைல் திரையரங்கம். எம்டிஎம் ஆக்டிவ் டிஜி பிரைவேட் லிமிடெட் நிறுவனம், மூவி டு மொபைல் என்ற என்கிற புதிய தளத்தை அறிமுகப்படுத்தியுள்ளது. படத்தின் டிக்கெட்டை அருகாமையில் உள்ள கடைகளில் பெற்று அதை மூவி டு மொபைல் ஆப் மூலம் ஸ்கேன் செய்து படத்தைப் பார்த்து விடலாம். தமிழ் திரைப்படத் தயாரிப்பாளர்கள் சங்கத் தலைவர் முரளி ராமநாராயணனின் வழிகாட்டுதலின் பேரில் இயக்குநர்கள் விஜய் சேகரன், தயானந்தன் பழனி இருவரும் இந்நிறுவனத்தை துவங்கியுள்ளனர்.

சினிமா டிக்கெட்டுகளை தமிழ்நாடு மற்றும் பாண்டிச்சேரி முழுவதும் விநியோகம் செய்யும் உரிமையை, ஸ்ரீ ரேணுகா டிஜிட்டல் டிஸ்ட்ரிபியூட்டர் நிறுவனத்தின் தலைவர் கோவிந்தராஜ் எடுத்துள்ளார். மாவட்ட வாரியாக விநியோகஸ்தர்களை நியமித்து கிராமங்கள் வரை மளிகை உள்ளிட்ட பிற கடைகளில் படத்தின் டிக்கெட் கிடைக்குமாறு செய்யப்பட்டுள்ளது. முதல் படமாக கடந்த 13-ஆம் தேதி யாஷிகா ஆனந்த் நடிப்பில் "பெஸ்ட்டி' படம் இத்தளத்தில் வெளியாகியுள்ளது. அடுத்தடுத்து படங்கள் இத்தளத்தில் வெளியாகவுள்ளன.