சங்கர்ஷனா

மஹிந்திரா பிக்சர்ஸ் நிறுவனத்தின் சார்பில் உருவாகி வரும் படம் " சங்கர்ஷனா'.  தமிழ், தெலுங்கு ஆகிய மொழிகளில் உருவாகி வரும் இப்படத்தில் சைதன்யா,  ரஷீதா, சிவா, ஹரி, மது, பிரேம், எக்ஸ்பிரஸ் ஹரி உள்ளிட்டோர் நடிக்கின்றனர்.  ஆதித்யா ஸ்ரீராம் இசையமைக்கிறார். கதை, திரைக்கதை எழுதி இப்படத்தை சின்னா வெங்கடேஷ் இயக்குகிறார்.

படம் பற்றி சின்னா வெங்கடேஷ் பேசும்போது.... 

""பெண் கொடுமைகளுக்கு எதிரான தீர்க்கமான ஒரு அரசியல் பார்வையை முன் வைக்கும் விதமாக உருவாகி வரும் படம் இது.  ஆண்மையும்  பெண்மையும் உருவங்கள் மட்டுமே இல்லை. அதில் அவ்வளவு உணர்வுகள் உண்டு. ஒருவருக்குள் ஒருவர் தொலையாமல், ஒருவருக்குள் ஒருவர் தேடாமல், அடைய வேண்டும் என்று நினைக்கிற போதுதான் அசிங்கமாகி விடுகிறோம். 

பெரும்பாலான ஆண்கள் அசிங்கமாக நிற்பதற்கு, பெண்மையை அடைந்து விட வேண்டும் என நினைப்பதுதான் காரணம்.  ஒருவரின் வலியை  இன்னொருவர் புரிந்துக் கொள்ளும் போதுதான் வாழ்க்கை அழகாக மாறுகிறது. 

ஒரு விஷயத்தை இன்னொரு விஷயத்தில் தேடும்போதும், தொலைக்கும் போதும்தான் நாம மனிதர்களாக ஆகிறோம் என்பது நம்பிக்கை.  பெண்மை, கற்பு, ஒழுக்கம் போன்ற கலாசார மதிப்பீடுகள் எல்லாம் வேறு வேறு அர்த்தங்கள் பெற்று உருமாறி விட்டன. 

இன்னும் சில காலங்களில் பண்பாடு, கலாசாரங்களில் எப்படி நடந்துக் கொள்ள வேண்டும் என்பது தெரியாமல் தவிக்கப் போகிறோம். பெண்கள் உடலளவில் பலவீனமானவர்கள் என்பதைத் தெரிந்துக் கொண்டு எத்தனை பிரச்னைகளை உருவாக்கி விடுகிறது சமூகம். 

பெண்களுக்கு எதிராக சமீபகாலமாக அரங்கேற்றப்பட்டு வரும் பாலியல் தொந்தரவுகளை முன் வைக்கும் விதமாகவும் கதை இருக்கும்'' என்றார்.