இறுதி முயற்சி

வரம் சினிமாஸ் தயாரிப்பில் நடிகர் ரஞ்சித், மெகாலி மீனாட்சி விட்டல் ராவ் நடித்துள்ள 'இறுதி முயற்சி' படத்தின் படப்பிடிப்பு இனிதே நிறைவுற்றது. இப்படத்தை வெங்கட் ஜனா கதை, திரைக்கதை, வசனம் எழுதி இயக்கியுள்ளார். படத்தின் படப்பிடிப்பு இனிதே நிறைவு பெற்றதைக் கொண்டாட படக்குழுவினர் மனநலம் குன்றிய சிறுவர்கள் பள்ளிக்கூடத்திற்கு சென்று அங்கு படிக்கும் சிறுவர்களுக்கு பரிசுப் பொருட்களை வழங்கி அவர்களை சந்தோஷப்படுத்தி அந்த மனநலம் குன்றிய சிறுவர்களின் அன்பையும் ஆசியையும் பெற்று வந்தனர்.

சாதாரண பெட்டிக் கடை வைத்திருப்பவர் முதல் பல கோடிகளில் வணிகம் செய்யும் பெரும் தொழில் அதிபர்களும் சந்திக்கும் ஒரு பிரச்னையை சொல்லும் விதமாக இப்படத்தின் திரைக்கதை அமைக்கப்பட்டுள்ளது. நெஞ்சத்தை பதை பதைக்க வைக்கும் வகையில் சஸ்பென்ஸ் த்ரில்லர் பாணியில் திரைக்கதை அமைத்து அனைத்து தரப்பு மக்களும் குடும்பத்தினருடன் ரசித்து பார்க்கும் விதமாகவும் மக்களுக்கு விழிப்புணர்வு ஏற்படுத்தும் விதமாகவும் இப்படம் உருவாகியுள்ளது.

ரஞ்சித், மெகாலி மீனாட்சி முதன்மை கதாபாத்திரங்களில் நடிக்க விட்டல் ராவ், கதிரவன், புதுப்பேட்டை சுரேஷ் இன்னும் பலர் முக்கிய கதாபாத்திரங்களில் இணைந்து நடிக்கின்றனர். படத்தொகுப்பு - வடிவேல் விமல் ராஜ், ஒளிப்பதிவு - சூர்யா காந்தி, இசை - சுனில் லாசர், கலை - பாபு பிரபாகர், பாடலாசிரியர் - மஷீக் ரஹ்மான். இத்திரைப்படத்தின் படப்பிடிப்பு நிறைவு பெற்ற நிலையில், இறுதி கட்ட பணிகள் தொடர்ந்து நடைபெற்று வர, விரைவில் படத்தின் டீஸர் மற்றும் போஸ்டர் வெளியீடு பற்றிய அதிகாரப்பூர்வ அறிவிப்பு வெளியாக உள்ளது.