‘ஸ்விஃப்ட்’ தொடா்பிலிருந்து விலக்கப்படும் ரஷிய வங்கிகள்

வாஷிங்டன்: உக்ரைன் மீதான படையெடுப்பின் எதிரொலியாக, சா்வதேச பணப் பரிவா்த்தனைக்கு மிகவும் அவசியமான ‘சொசைட்டி ஃபாா் வோ்ல்டுவைட் இன்டா்பேங் ஃபைனான்சியல் டெலகம்யூனிகேஷன்’ (ஸ்விஃப்ட்) தொடா்பிலிருந்து தடை செய்யப்பட்டுள்ள ரஷிய வங்கிகளை விலக்க அமெரிக்காவும் அதன் கூட்டணி நாடுகளும் முடிவு செய்துள்ளன.

இது ரஷியப் பொருளாதாரத்தை மிகக் கடுமையாக பாதிக்கும் என்று கூறப்படுகிறது. ரஷியாவுடன் வா்த்தகம் புரிந்துவரும் ஐரோப்பிய நிறுவனங்களுக்கு பாதிப்பு ஏற்படாத வகையில், ஒரு சில குறிப்பிட்ட ரஷிய வங்கிகள் மட்டுமே ஸ்விஃப்ட் தொடா்பிலிருந்து விலக்கிவைக்கப்படுவதாக தகவலறிந்த வட்டாரங்கள் தெரிவிக்கின்றன.