மாணவர் விசா கட்டணத்தை இருமடங்கு உயர்த்திய ஆஸ்திரேலியா!

ஆஸ்திரேலிய அரசு சர்வதேச மாணவர்களுக்கான விசா கட்டணத்தை இருமடங்கு உயர்த்தி அறிவிப்பு வெளியிட்டுள்ளது.

பிரதமர் ஆண்டனி அல்பனேசி தலைமையிலான ஆஸ்திரேலிய அரசு, இந்திய மதிப்பில் ரூ.40,000-ஆக இருந்த மாணவர் விசா கட்டணத்தை உயர்த்தி ரூ.89,000 ஆக்கியுள்ளது. அதிகளவிலான மாணவர்களின் இடம்பெயர்வைக் கட்டுப்படுத்தும் நோக்கில் கொண்டு வரப்பட்ட இந்தக் கட்டண உயர்வு இன்று (ஜூலை 1) முதல் அமலுக்கு வருவதாக அறிவிக்கப்பட்டுள்ளது.

ஆஸ்திரேலியாவில் விசாவை நீட்டித்துத் தங்கியிருக்கும் மாணவர்கள் மற்றும் இரண்டாவது முறை மாணவர் விசா பெற்ற மாணவர்களின் எண்ணிக்கை 30% உயர்ந்து கடந்த 2022-23 ஆண்டுகளில் 1,50,000-ஐ எட்டியுள்ளதைத் தொடர்ந்து விசா விதிகளில் உள்ள தளர்வுகளை நீக்கியதாக ஆஸ்திரேலிய அரசு தெரிவித்துள்ளது.

சில மாதங்களுக்கு முன்பு ஆங்கில மொழிப் புலமை விதிகள் கடுமையாக்கப்பட்டதைத் தொடர்ந்து, மாணவர் விசா பெறுவதற்கு மாணவர்களின் சேமிப்பு இருப்புத் தொகையை ரூ.13 லட்சத்திலிருந்து ரூ.16 லட்சமாக ஆஸ்திரேலிய அரசு உயர்த்தியிருந்தது. தற்போது விசா கட்டணத்தையும் உயர்த்தியிருப்பது அங்கு படிக்கச் செல்லும் இந்திய மாணவர்களை பாதிக்க அதிக வாய்ப்புள்ளதாகக் கூறப்படுகிறது.

மேலும், தற்காலிக விசா பயன்படுத்தும் பயணிகள், தற்காலிக பட்டதாரிகள், கப்பல் குழு பணியாளர் விசா பயனாளர்கள் ஆகியோர் மாணவர் விசாவை இனி பயன்படுத்த முடியாது என்றும் அறிவிக்கப்பட்டுள்ளது. இதனால், பல நாட்டு மாணவர்களும் பாதிப்படைவார்கள்.

கடந்த மார்ச் மாதம் வெளியான தரவுகளின் படி கடந்தாண்டு செப்டம்பர் வரை ஆஸ்திரேலியாவில் குடியேறுபவர்கள் 60% உயர்ந்து 5,48,800 பேரை எட்டியுள்ளதாகத் தகவல்கள் வெளியாகின.

தற்போது கொண்டு வந்துள்ள மாற்றங்கள் சர்வதேச கல்வி முறையின் தரத்தை மேம்படுத்தவும், இடம்பெயர்வை குறைவாகவும், சிறப்பாகவும் மாற்ற ஆஸ்திரேலியாவிற்கு உதவும் என்றும் ஆஸ்திரேலிய உள்துறை அமைச்சர் கிளேர் ஓ’நீல் தெரிவித்துள்ளார்.

ஆஸ்திரேலிய பல்கலைக்கழகக் குழு தலைவர் லூக் ஷீஹி கூறுகையில் ”இந்த முடிவு சர்வதேச மாணவர்களின் கல்விக் கட்டணத்தை நம்பியுள்ள பல்கலைக்கழகங்கள் மற்றும் பொருளாதாரம் இரண்டுக்கும் உகந்ததல்ல” என்றார்.

அமெரிக்கா, பிரிட்டன் நாடுகளை விட ஆஸ்திரேலியாவின் மாணவர் விசா கட்டணம் உயர்ந்துள்ளது குறிப்பிடத்தக்கது.