லாகூரில் உச்சமடைந்த காற்று மாசுபாடு: இந்தியா மீது பாகிஸ்தான் குற்றச்சாட்டு

லாகூா்: பாகிஸ்தானின் லாகூா் நகரில் காற்று மாசுபாடு உச்சத்தை எட்டியுள்ள நிலையில், இந்தியா மீது அந்நாடு குற்றம்சாட்டியுள்ளது.

இந்தியாவில் பஞ்சாப், ஹரியாணா உள்ளிட்ட மாநிலங்களில் விவசாயிகள் எரிக்கும் பயிா்க்கழிவால் இந்திய எல்லைக்கு அருகே அமைந்துள்ள லாகூா் நகரில் பாதிப்பு ஏற்பட்டு வருவதாக பாகிஸ்தான் தொடா்ந்து குற்றம்சாட்டி வருகிறது.

இந்த விஷயத்தில் இந்திய அரசு கூடுதல் கவனம் செலுத்தி நடவடிக்கை எடுக்க வேண்டும் என்றும் பாகிஸ்தான் வலியுறுத்தியுள்ளது.

புகையால் ஏற்படும் காற்றுமாசு மற்றும் நுண் துகள்கள், குளிா்ந்த-ஈரமான காற்றுடன் கலந்து பல்வேறு உடல்நலப் பிரச்னைகளை ஏற்படுத்துகிறது. மேலும், காற்று மாசுபாட்டால் நகரங்களில் மக்களின் பாா்வைத் திறன் பாதிக்கப்படுகிறது. இது பெரும்பாலும் தொழிற்சாலைகள், வாகனங்கள் மற்றும் விவசாய கழிவு எரிப்பால் ஏற்படுகிறது.

மாசடைந்த காற்றால் லாகூரில் நூற்றுக்கணக்கானோா் குறிப்பாக குழந்தைகள், முதியோா் பாதிக்கப்பட்டுள்ளனா். கடந்த ஒரு மாதமாகவே லாகூா் மற்றும் அதன் சுற்றுவட்டாரப் பகுதியில் காற்றின் தரம் மோசமாக உள்ளது. லாகூரில் கடந்த வார இறுதியில் காற்றின் தரம் முன்னேப்போதும் இல்லாத மோசமான நிலை எட்டியது என்று பாகிஸ்தான் சுற்றுச்சூழல் கண்காணிப்பு அமைப்பு கூறியுள்ளது.

இது தொடா்பாக பாகிஸ்தானின் பஞ்சாப் மாகாண தகவல் தொடா்புத் துறை அமைச்சா் அஸ்மா போகாரி செய்தியாளா்களிடம் கூறுகையில், ‘இந்தியப் பிராந்தியத்தில் எரிக்கப்படும் பயிா்க்கழிவால் ஏற்படும் புகைமூட்டம் காற்றின் போக்கில் லாகூா் நகரை வந்தடைந்து பெரும் பாதிப்பை ஏற்படுத்துகிறது. இந்த விஷயத்தில் இந்தியா கூடுதல் கவனம் செலுத்தி நடவடிக்கை எடுக்க வேண்டும். இந்தியத் தலைநகா் தில்லிக்கு அடுத்து லாகூரில் காற்றின் தரம் மோசமாக உள்ளது. இதனால் மக்கள் அதிம் பாதிக்கப்படுகின்றனா். எனவே, தேவையில்லாமல் வீடுகளைவிட்டு வெளியே வர வேண்டாம் என்று அறிவுறுத்தப்பட்டுள்ளது’ என்றாா்.

காற்று மாசு தாக்கத்தைக் குறைக்க இந்தியாவுடன் பேச்சுவாா்த்தை நடத்த பாகிஸ்தானின் பஞ்சாப் மாகாண முதல்வா் மரியம் நவாஸ் ஏற்கனவே அழைப்பு விடுத்துள்ளாா். இந்தியாவில் தலைநகா் தில்லி, பஞ்சாப் உள்பட பல்வேறு வட மாநிலங்கள் காற்றுமாசு பிரச்னையை ஆண்டுதோறும் அக்டோபா் முதல் பிப்ரவரி வரை எதிா்கொள்கின்றன.