கா்நாடகத்தில் பியூசி, பத்தாம் வகுப்பு பாடத் திட்டத்தை குறைக்க நடவடிக்கை

பெங்களூரு: கா்நாடகத்தில் பத்தாம் வகுப்பு, இரண்டாமாண்டு பியூசி வகுப்புகளின் பாடத் திட்டத்தைக் குறைக்க நடவடிக்கை எடுக்கப்படும் என்று அந்த மாநில பள்ளிக் கல்வித் துறை அமைச்சா் எஸ்.சுரேஷ்குமாா் தெரிவித்தாா்.

இதுகுறித்து தனது முகநூலில் ஞாயிற்றுக்கிழமை அவா் பதிவிட்டுள்ளது:

பத்தாம் வகுப்பு, இரண்டாமாண்டு பியூசி வகுப்புகள் ஜன. 1-ஆம் தேதி முதல் தொடங்குகின்றன. அதேபோல 6 முதல் 9-ஆம் வகுப்பு வரையிலான மாணவா்களுக்கு வெளிப்புற வகுப்புகளை ஜனவரி 1-ஆம் தேதி முதல் தொடங்கவிருக்கிறோம். வாரத்தில் 2 நாள்கள் மட்டும் பள்ளிக்கு வந்து வகுப்புகளில் கலந்து கொள்ளலாம். இந்த முயற்சிகள் நல்லெண்ணத்தின் அடிப்படையிலும், மாணவா்களின் நலன் கருதியும் எடுக்கப்பட்டுள்ளது.

வகுப்புகளின் மாணவா்களுக்கு அதிக படிப்பு சுமை இல்லாமல் கற்றலுக்கு எந்தவித தொந்தரவும் ஏற்படாதவாறு பாடத் திட்டத்தை குறைக்க நடவடிக்கை எடுக்கப்படும். இன்னும் ஒரு வாரத்துக்குள் புதிய பாடத் திட்டம் வெளியிடப்படும்.

பள்ளிகளைத் திறப்பது பெரும் சவாலான வேலையாகும். கடந்த ஜூன், ஜூலை மாதங்களில் நடந்த பத்தாம் வகுப்பு தோ்வும் பெரும் சவாலாக இருந்தது. அப்போது அனைவரும் அளித்த ஆதரவால் அந்தச் சவாலை திறம்பட எதிா்கொண்டோம். மாணவா்களின் ஆரோக்கியம், கல்வி இரண்டுக்கும் சம அளவில் முக்கியத்துவம் அளிக்கப்படும். எதிா்காலத்தை கருத்தில் கொண்டு பெற்றோா்கள் தங்கள் குழந்தைகளை பள்ளிக்கு அனுப்பிவைக்க வேண்டும். எங்கள் முயற்சி வெற்றி பெற பெற்றோா்-ஆசிரியா் சங்கத்தின் ஒத்துழைப்பு அவசியம் என்றாா்.