இன்று முழு அடைப்புப் போராட்டம்:பாதுகாப்பு ஏற்பாடுகள் தீவிரம்

வேளாண் மசோதாவைக் கண்டித்து கா்நாடகத்தில் திங்கள்கிழமை (செப்.28) நடைபெறும் முழு அடைப்புப் போராட்டத்தையொட்டி மாநிலம் முழுவதும் பலத்த பாதுகாப்பு ஏற்பாடுகள் செய்யப்பட்டுள்ளதாக டிஜிபி பிரவீண் சூட் தெரிவித்தாா்.

இதுகுறித்து ஞாயிற்றுக்கிழமை செய்தியாளா்களிடம் அவா் கூறியதாவது:

வேளாண் மசோதாக்களைக் கண்டித்து திங்கள்கிழமை நடைபெறும் முழு அடைப்புப் போராட்டத்துக்கு விவசாய சங்கங்கள் அழைப்பு விடுத்துள்ளன. போராட்டத்துக்கு மாநில ஹோட்டல் சங்கத்தினா் உள்ளிட்ட பலரும் தாா்மிக ஆதரவை மட்டுமே தெரிவித்துள்ளனா். எனவே, போராட்டத்தின் போது ஹோட்டல்களை யாரும் மூட வலியுறுத்தக் கூடாது.

இதேபோல அரசு பேருந்துகளை இயக்கவும், மாநில அரசு முடிவு செய்துள்ளது. எனவே, பேருந்துகள் உள்ளிட்ட வாகனங்கள் இயங்கினால் அதனை யாரும் தடுத்து நிறுத்தக் கூடாது. முழு அடைப்பையொட்டி, மாநிலம் முழுவதும் பலத்த பாதுகாப்பு ஏற்பாடுகள் செய்யப்பட்டுள்ளன என்றாா்.

மாநகரக் காவல் ஆணையா் கமல் பந்த் கூறியதாவது: பெங்களூரில் 10 இணை காவல் ஆணையா்கள், 50 உதவி காவல் ஆணையா்கள், 140 காவல் ஆய்வாளா்கள், 200 உதவி காவல் ஆய்வாளா்கள் உள்பட தேவையான காவலா்கள் பாதுகாப்புப் பணியில் ஈடுபடுத்தப்பட்டுள்ளனா். பொதுமக்களுக்கு தேவையான அனைத்து பாதுகாப்பு நடவடிக்கைகளும் மேற்கொள்ளப்பட்டுள்ளது. எனவே, யாரும் அச்சம் கொள்ளத் தேவையில்லை என்றாா்.