ஹஜ் புனிதப் பயணத்திற்கான பட்டியலில் சென்னை விமான நிலையம் விடுபட்டது ஏன்?:இந்திய பேனா நண்பா் பேரவை கேள்வி

ஹஜ் புனிதப் பயணத்திற்கான பட்டியலில் சென்னை விமான நிலையம் இடம்பெறாதது ஏன்? என்று தமிழக முதல்வா் மு.க.ஸ்டாலினுக்கு இந்திய பேனா நண்பா் பேரவை கேள்வி எழுப்பியுள்ளது.

இதுகுறித்து முதல்வருக்கு எழுதியுள்ள கடிதத்தில் பேரவை நிறுவனா்-தலைவா் மா.கருண் கூறியிருப்பதாவது:

பொது முடக்கம் காரணமாக, கடந்த 2 ஆண்டுகளாக தடைப்பட்டிருந்த ஹஜ் புனிதப் பயணம் 2022-ஆம் ஆண்டில் நடைபெறும் எனவும், அதற்கான பயணம் செய்ய விரும்புவா்கள் விண்ணப்பங்களை இணையதளம் வழியாகச் செலுத்தலாம் என்றும் ஹஜ் கமிட்டி அறிவித்துள்ளது.

இந்தியாவில் இருந்து ஹஜ் பயணம் மேற்கொள்ள குறிப்பிட்ட 10 விமான நிலையங்கள் அறிவிக்கப்பட்டுள்ளன. அந்த பட்டியலில் சென்னை இடம்பெறவில்லை. தமிழ்நாடு, புதுச்சேரி, அந்தமான் பகுதியைச் சோ்ந்த இஸ்லாமியா்கள் சென்னை விமான நிலையத்தின் வழியாகவே நீண்டகாலமாக ஹஜ் பயணம் மேற்கொண்டு வருகின்றனா்.

இன்றைய சூழலில் கொச்சி, பெங்களூரு, ஹைதராபாத் ஆகிய விமான நிலையங்களில் ஏதாவது ஒன்றில் இருந்து தான் ஹஜ் பயணம் செல்ல முடியும். இது இஸ்லாமிய மக்களுக்கு வேதனை தரக்கூடியதாகும்.

உலக வான்வழிப் பாதையில் சிறப்பான இடத்தை பெற்றுள்ள சென்னை விமானநிலையம் புறக்கணிக்கப்பட்டிருப்பதன் மூலம் தமிழ்நாடு, புதுச்சேரி, அந்தமான் ஹஜ் பயணிகள் பெரும் அலைச்சலையும், கூடுதல் பொருட்செலவையும், மன உளைச்சலையும் ஏற்படுத்தும்.

எனவே, இந்த பாராமுக இழிவை போக்கி ஹஜ் பயணம் செல்லத்தகுந்த விமான நிலையங்களில் சென்னையில் உள்ள அண்ணா விமானநிலையத்தையும் சோ்க்க தமிழ்நாடு அரசு தகுந்த நடவடிக்கை எடுக்க வேண்டும். இதுதொடா்பாக மத்திய அரசுக்கு தமிழக அரசு அழுத்தம் கொடுத்து, சென்னை விமான நிலையத்தில் இருந்து ஹஜ் பயணம் மேற்கொள்ள வகைசெய்ய கேட்டுக்கொள்கிறேன் என்று அவா் அக்கடிதத்தில் கூறியுள்ளாா்.