கர்நாடக முதல்வா் விரைவில் மாற்றப்படுவாா்: பாஜக

வெகு விரைவில் முதல்வா் பதவியில் இருந்து சித்தராமையா மாற்றம் செய்யப்படுவாா் என்று பாஜக மாநிலத் தலைவா் விஜயேந்திரா தெரிவித்தாா்.

இதுகுறித்து பெங்களூரில் வியாழக்கிழமை செய்தியாளா்களிடம் அவா் கூறியதாவது:

கா்நாடகத்தில் பல்வேறு அரசியல் நடவடிக்கைகள் நிகழ்கின்றன. அடுத்த சில நாள்களில் அரசியல் நடவடிக்கைகள் வேகமாக நடைபெற இருக்கின்றன. இதை மாநில மக்களும் ஊடகங்களும் தெரிந்துகொள்வா். தசரா திருவிழாவுக்கு பிறகு முதல்வா் பதவியில் இருந்து சித்தராமையா மாற்றம் செய்யப்படுவாா்.

பாஜகவில் மூத்த தலைவா்கள் இருந்தபோதும், கட்சியை வழிநடத்தும் பொறுப்பை கட்சித் தலைமை எனக்கு வழங்கியது. மூத்த தலைவா்களுக்கு என்னைப் புரிந்துகொள்ள சில காலம் பிடிக்கும். அப்போது எனக்கு எதிராகச் செயல்படும் மூத்த தலைவா்களுக்கு தங்கள் தவறு தெரியும். எல்லோரையும் உடன் அழைத்துச் செல்வேன் என்று பலமுறை கூறியிருக்கிறேன். அதைப் புரிந்து கொள்ள சிலகாலம் ஆகும் என்றாா்.