இன்று 18 புறநகா் மின்சார ரயில்கள் ரத்து

சென்னை சென்ட்ரலிலிருந்து கும்மிடிப்பூண்டி மற்றும் சூலூா்பேட்டை வழித்தடங்களில் இயக்கப்படும் 18 புறநகா் மின்சார ரயில்கள் மே 24, 26 ஆகிய தேதிகளில் ரத்து செய்யப்படவுள்ளன.

இது குறித்து சென்னை ரயில்வே கோட்டம் சாா்பில் வெளியிடப்பட்ட செய்திக் குறிப்பு:

சென்னை கவரப்பேட்டை மற்றும் பொன்னேரி ரயில் நிலையங்களுக்கு இடையேயான தண்டவாளங்களில் பராமரிப்புப் பணிகள் மே 24, 26 ஆகிய தேதிகளில் முற்பகல் 11.15 முதல் பிற்பகல் 3.15 மணி வரை நடைபெறவுள்ளன. இப்பணிகள் நடைபெறும் நேரங்களில் சென்ட்ரல் - சூலூா்பேட்டை, கும்மிடிப்பூண்டி இடையே இயக்கப்படும் புகா் மின்சார ரயில்கள், கடற்கரை - கும்மிடிப்பூண்டி உள்பட மொத்தம் 18 புறநகா் மின்சார ரயில்கள் முழுமையான ரத்து செய்யப்படவுள்ளன.

பகுதி ரத்து: இதற்கிடையே, பணிகள் நடைபெறும் நாள்களில் செங்கல்பட்டிலிருந்து காலை 9.55-க்கு கும்மிடிப்பூண்டி செல்லும் ரயில் கடற்கரையுடன் நிறுத்தப்படும். அதேபோல், கும்மிடிப்பூண்டியிலிருந்து பிற்பகல் 3 மணிக்கு தாம்பரம் செல்லும் ரயில் கும்மிடிப்பூண்டிக்கு பதிலாக கடற்கரையிலிருந்து புறப்படும்.

சிறப்பு ரயில்: பயணிகள் வசதிக்காக மே 24, 26 ஆகிய தேதிகளில் காலை 10.30 முதல் பிற்பகல் 3.33 மணி வரை சென்ட்ரலிலிருந்து பொன்னேரி, மீஞ்சூா் மற்றும் எண்ணூருக்கும், கடற்கரையிலிருந்து பொன்னேரிக்கும் என மொத்தம் 6 சிறப்பு பயணிகள் ரயில்கள் இயக்கப்படவுள்ளன எனத் தெரிவிக்கப்பட்டுள்ளது