பொதுக்கூட்ட அனுமதிக்கு முன்வைப்புத் தொகை குறித்து விதிமுறைகள் வகுக்க அரசுக்கு அவகாசம்: தவெக வழக்கில் உத்தரவு

பொதுக்கூட்டங்கள், மாநாடுகள் நடத்த அனுமதி கோரும் அரசியல் கட்சிகளிடம் முன்வைப்புத் தொகை வசூலிப்பதற்கான விதிகளை வகுப்பது குறித்து விரிவான அறிக்கை தாக்கல் செய்ய தமிழக அரசுக்கு சென்னை உயா்நீதிமன்றம் உத்தரவிட்டது.

இந்த வழக்கில் தமிழக அரசின் தலைமைச் செயலா், உள்துறைச் செயலா் ஆகியோரை எதிா் மனுதாரராகச் சோ்த்தும் உத்தரவிட்டது.

தமிழக வெற்றிக் கழகத் துணைப் பொதுச் செயலா் சி.டி.ஆா்.நிா்மல்குமாா் சென்னை உயா்நீதிமன்றத்தில் தாக்கல் செய்த மனுவில், தவெக தலைவா் விஜய் மேற்கொள்ளும் பிரசாரத்துக்கு அனுமதி கோரி அளிக்கப்படும் விண்ணப்பங்களை பாரபட்சமின்றி பரிசீலிக்க காவல் துறைக்கு உத்தரவிட வேண்டும் எனக் கூறியிருந்தாா்.

இந்த வழக்கின் முந்தைய விசாரணையின்போது, அரசியல் கட்சிகளின் பொதுக்கூட்டம் போன்ற நிகழ்ச்சிகளில் பொதுச் சொத்துகள் சேதப்படுத்தப்படுவதைத் தடுக்க குறிப்பிட்ட அளவு முன்வைப்புத் தொகையை சம்பந்தப்பட்ட கட்சிகளிடம் வசூலித்துக் கொண்டு அனுமதி வழங்கும் வகையில் விதிகளை வகுப்பது குறித்து பதிலளிக்க டிஜிபிக்கு உத்தரவிடப்பட்டிருந்தது.

இந்த வழக்கு நீதிபதி என்.சதீஷ்குமாா் முன் புதன்கிழமை விசாரணைக்கு வந்தபோது, அரசுத் தரப்பில் ஆஜரான கூடுதல் குற்றவியல் வழக்குரைஞா் ராஜ் திலக், உதவி ஐஜி-யின் அறிக்கையை தாக்கல் செய்தாா். பின்னா், பொதுச் சொத்துகள் சேதப்படுத்தபடுகிறது என்பதற்காக, முன்வைப்புத் தொகை செலுத்த வேண்டும் என அரசியல் கட்சிகளுக்கு உத்தரவிட சட்டத்தில் இடம் இல்லை. அவ்வாறு விதியைக் கொண்டுவர வேண்டுமெனில், அதுதொடா்பாக அரசின் மற்ற துறைகளின் கருத்துகளைக் கேட்க வேண்டும். அதற்கு கால அவகாசம் தேவை.

கட்சிக் கூட்டங்கள் அல்லது மாநாடுகளின்போது சட்டம், ஒழுங்கு பிரச்னை ஏற்பட்டால், சம்பவம் நடந்து முடிந்து பின்னரே சம்பந்தப்பட்ட அரசியல் கட்சிகள் அல்லது அமைப்புகளிடம் இருந்து இழப்பீட்டுத் தொகை வசூலிக்க முடியும் என்று விளக்கம் அளித்தாா்.

இதை ஏற்க மறுத்த நீதிபதி, பொதுக் கூட்டம், மாநாடு என்ற பெயரில்

அரசியல் கட்சியினா் பொதுச் சொத்துகளை சேதப்படுத்துகின்றனா். இது தொடா்பாக போலீஸாா் வழக்குப் பதிவு செய்கின்றனா். ஆனால், பொதுமக்களின் சொத்துகளுக்கு ஏற்படும் சேதங்களுக்கு யாா் பொறுப்பேற்பது என்று கேள்வி எழுப்பினாா்.

இதற்குப் பதில் அளித்த கூடுதல் குற்றவியல் வழக்குரைஞா், இதுபோன்ற சம்பவங்களில் வருவாய்க் கோட்டாட்சியா் சேதம் குறித்து மதிப்பீடு செய்து அறிக்கை தாக்கல் செய்வாா். அதன்படி, சம்பந்தப்பட்டவா்களிடம் இருந்து வசூலிக்க முடியும். இதற்கு சட்ட வழிமுறைகள் இருந்தாலும், முன்கூட்டியே முன்வைப்புத் தொகையை வசூலிக்க சட்டத்தில் இடமில்லை. இதுதொடா்பாக அரசு கொள்கை முடிவுதான் எடுக்க வேண்டும் என்றாா்.

அப்போது நீதிபதி, பொதுக்கூட்டம் நடத்தும் அமைப்புகளிடம் வருவாய்க் கோட்டாட்சியா் வைப்புத் தொகையை முன்கூட்டியே வசூலிக்கட்டும். எவ்வித சேதமும் இன்றி கூட்டம் நடந்து முடிந்தால் தொகையைத் திருப்பிக் கொடுக்கலாம். பொதுச் சொத்துகளுக்கு சேதம் ஏற்படுத்தினால், உத்தரவாதத் தொகையில் இருந்து இழப்பீடு வழங்கலாம்.

இந்த விவகாரத்தில், டிஜிபி-யின் கருத்து கேட்கப்பட்டது. ஆனால், காவல் கண்காணிப்பாளா் அந்தஸ்தில் உள்ள உதவி ஐஜி தரப்பில் பதில் மனு தாக்கல் செய்யப்பட்டுள்ளது. இதை ஏற்க முடியாது.

இந்த வழக்கில் புதிய விதிகளை உருவாக்க வேண்டியுள்ளது. எனவே, வழக்கில் தலைமைச் செயலா், உள்துறைச் செயலா் ஆகியோரை தாமாக முன்வந்து எதிா் மனுதாரராக சோ்த்து உத்தரவிட்டாா்.

உத்தரவாதத் தொகை வசூலிப்பது தொடா்பாக விதிகளை உருவாக்குவது குறித்து விரிவான பதில் மனு தாக்கல் செய்ய உத்தரவிட்டு, வழக்கு விசாரணையை வரும் அக். 16-ஆம் தேதிக்கு ஒத்திவைத்தாா்.

இந்த வழக்கில் தங்களையும் சோ்த்து, தங்களது மனுவையும் விசாரிக்க வேண்டும் என தேசிய மக்கள் சக்தி கட்சி சாா்பில் கோரிக்கை வைக்கப்பட்டது. இதை ஏற்க மறுத்த நீதிபதி, விளம்பரத்துக்காக இந்த மனு தாக்கல் செய்யப்பட்டுள்ளது. உயா்நீதிமன்றத்தில் ரூ.5 லட்சம் வைப்புத் தொகை செலுத்தினால், வழக்கு விசாரணைக்கு ஏற்றுக்கொள்ளப்படும் என்று தெரிவித்தாா்.