"நரம்பியல் அவசர சிகிச்சையின் தேவை அதிகரிப்பு'

சாலை விபத்துகளில் சிக்கி பலத்த காயமடைந்து, உரிய சிகிச்சை வசதியின்றி உயிரிழப்பவர்களின் எண்ணிக்கை ஆண்டுதோறும் அதிகரித்து வருவதால், மருத்துவமனைகளில் அனைத்து வசதிகளும் கொண்ட நரம்பியல் அவசர சிகிச்சை தேவை பன்மடங்கு அதிகரித்துள்ளது என்று, குளோபல் மருத்துவமனை நரம்பியல் அறுவைச் சிகிச்சைத் துறைத் தலைவர் டாக்டர் கே.ஸ்ரீதர் கூறினார்.
 சென்னையில், நரம்பியல் அவசர சிகிச்சைகளுக்கான 3 நாள் கருத்தரங்கை டாக்டர் எம்.ஜி.ஆர். மருத்துவப் பல்கலைக்கழகத் துணைவேந்தர் டாக்டர் டி.சாந்தாராம் தொடக்கிவைத்தார். பேராசிரியர்கள் டாக்டர் டி.எஸ்.கனகா,கிருஷ்ணமூர்த்தி ஸ்ரீநிவாஸ் ஆகியோர் பங்கேற்றனர்.
 இந்தக் கருத்தரங்கில் டாக்டர் கே.ஸ்ரீதர் பேசும்போது, விபத்தில் பாதிக்கப்பட்டவர்களுக்கு சில மணி நேரங்களில் வழங்கப்படும் சிகிச்சைதான் பெரும்பாலும் உயிர் காப்பதாக அமையும். எனவே, அவசர சிகிச்சை மருத்துவம் தேவை குறித்த விழிப்புணர்வு அதிகரிக்க உரிய நடவடிக்கை மேற்கொள்வது அவசியம் என்றார்.
 கருத்தரங்கில், இந்தியாவில் முதல்முறையாக சென்னை மருத்துவக் கல்லூரியில் தலைக் காயங்களுக்கான மருத்துவப் பிரிவை கடந்த 1950-இல் தொடங்கிய பிரபல நரம்பியல் மருத்துவப் பேராசிரியர் டாக்டர் பி.இராமமூர்த்தி பெயரில் ஏற்பாடு செய்யப்பட்டு இருந்த மருத்துவச் சொற்பொழிவில் மூத்த நரம்பியல் மருத்துவர் டாக்டர் என்.கே.வெங்கடரமணா உரை நிகழ்த்தினார்.