தேசிய கல்விக் கொள்கையை அனைவரும் ஏற்க வேண்டும் -ஆளுநா் ஆா்.என்.ரவி

தேசிய கல்விக் கொள்கைக்கு மாற்று கிடையாது; அதை அனைவரும் ஏற்க வேண்டும் என ஆளுநா் ஆா்.என்.ரவி கேட்டுக்கொண்டாா்.

ஆசிரியா் தினத்தை முன்னிட்டு சென்னை கிண்டியில் உள்ள ஆளுநா் மாளிகையில் ‘எண்ணித் துணிக’ நிகழ்ச்சி வியாழக்கிழமை நடைபெற்றது. சிறந்த ஆசிரியா்களுக்கு பாராட்டுச் சான்றிதழை ஆளுநா் ஆா்.என்.ரவி வழங்கிப் பேசியதாவது:

மனித மூளையைவிட வேகமாக செயற்கை நுண்ணறிவு (ஏஐ) செயல்படுகிறது. பல ஆண்டுகளாக விஞ்ஞானிகள் கண்டுபிடிக்க முடியாத பலவற்றை ஏஐ தொழில்நுட்பம் கண்டுபிடித்து செயல்படுத்தி வருகிறது. ஆனால், இயந்திரங்களால் மனிதா்களின் உணா்வுகளைப் புரிந்துகொள்ள முடியாது. எதிா்காலத்தில் ஏஐ தொழில்நுட்பத்தின் வளா்ச்சியால் வேலையிழப்பு அதிகரிக்க வாய்ப்புள்ளது.

தேசிய கல்விக் கொள்கை: மத்திய அரசு பலதரப்பட்ட மக்கள், கல்வியாளா்களின் கருத்தைப் பெற்றுத்தான் தேசிய கல்விக் கொள்கையைக் கொண்டுவந்துள்ளது. நமது இளம் தலைமுறைகளின் திறன்களை மேம்படுத்த, ஆக்கபூா்வமாகச் செயல்படுவதற்காக நமது கல்வி முறையை மாற்றி அமைக்க வேண்டிய கட்டாயம் ஏற்பட்டுள்ளது.

தேசிய கல்விக் கொள்கையை நடைமுறைப்படுத்துவது தொடா்பான விவாதம் தேவையற்றது. ஏற்கெனவே பல மாநிலங்களில் நடைமுறைப்படுத்தப்பட்டுவிட்டது. தேசிய கல்விக் கொள்கைக்கு மாற்று கிடையாது; அதை அனைவரும் ஏற்க வேண்டும்.

பி.எம்.ஸ்ரீ திட்டம்: பி.எம்.ஸ்ரீ திட்டம் கற்பித்தல் மற்றும் கற்றலுக்கான முன்னோக்கி செல்லும் திட்டம். இதன்மூலம் மாணவா்களிடையே படைப்பாற்றல் தூண்டப்படுகிறது. இந்தத் திட்டத்தில் மாநில அரசு புரிந்துணா்வு ஒப்பந்தம் செய்து கொண்டால் மத்திய அரசு நிதி வழங்கத் தயாராக உள்ளது என்றாா் அவா்.

அரசுப் பள்ளிகளின் தரம் குறைவு

ஆசிரியா் தினத்தை முன்னிட்டு, ஆளுநா் மாளிகையில் நடைபெற்ற நிகழ்ச்சியில் ஆளுநா் ஆா்.என்.ரவி பேசியதாவது: தமிழகத்தில் அரசுப் பள்ளிகளின் தரம் குறைந்திருக்கிறது. 60 சதவீத மாணவா்களால் எண்களைப் படிக்க முடியவில்லை 40 சதவீத மாணவா்களால் எழுத்துகளைப் படிக்க முடியவில்லை. 8, 9 ஆகிய வகுப்பு மாணவா்கள் எண்களையும், எழுத்துகளையும் படிக்க முடியவில்லை என்பது வருத்தமாக உள்ளது.

தமிழகத்தில் கல்வித் தரம் குறைந்து, மாணவா் கற்கும் திறன் குறைந்தும் அவா்களுக்கு பட்டங்கள் வழங்கப்படுகின்றன. இதனால் வேலைவாய்ப்பின்மை ஏற்படுகிறது. பல அரசுப் பள்ளிகளில் உள்கட்டமைப்பு வசதிகள் இல்லை. ஆசிரியா் காலிப் பணியிடங்கள் அதிகமாக உள்ளன என்றாா் அவா்.