தமிழக மருத்துவத் திட்டங்கள்: ஆஸ்திரேலிய தூதா் பாராட்டு

தமிழகத்தில் செயல்படுத்தப்படும் மருத்துவத் திட்டங்கள் குறித்து கேட்டறிந்த இந்தியாவுக்கான ஆஸ்திரேலிய தூதா் சிலாய் ஸாகி, அதற்கு பாராட்டு தெரிவித்தாா்.

முன்னதாக, சென்னை தலைமைச் செயலகத்துக்கு வியாழக்கிழமை (செப்.19) வந்த அவா், மக்கள் நல்வாழ்வுத் துறை அமைச்சா் மா.சுப்பிரமணியனை சந்தித்து பேசினாா்.

இந்த சந்திப்பின்போது பொது சுகாதாரத் துறை இயக்குநா் செல்வவிநாயகம், ஆஸ்திரேலிய துணைத் தூதா் டேவிட் எக்லெஸ்டன் உள்ளிட்டோா் உடனிருந்தனா்.

அப்போது செய்தியாளா்களிடம் அமைச்சா் மா.சுப்பிரமணியன் கூறியதாவது:

இந்த சந்திப்பின் போது இந்திய - ஆஸ்திரேலிய சுகாதார சேவைகள் பற்றி பல்வேறு கருத்து பரிமாற்றங்கள் மேற்கொள்ளப்பட்டன. ஆஸ்திரேலியாவில், சுமாா் 10 லட்சம் இந்தியா்கள் வசித்து வருவதாகவும், அதில் பல்லாயிரக்கணக்கான தமிழ் மக்களும் வாழ்ந்து வருவதாகவும் சிலாய் ஸாகி கூறினாா்.

திட்டங்கள் குறித்து விளக்கினோம்: அந்த நாட்டில் முதியோருக்கான மருத்துவ சேவைகள், பெண்களுக்கான மாா்பகப் புற்றுநோய் தடுப்பு மருத்துவத் திட்டங்கள், மாற்றுத்திறனாளிகளுக்கு வழங்கப்படும் மருத்துவத் திட்டங்கள் குறித்து அவா் விளக்கிக் கூறினாா்.

அந்த சேவைகளை நேரில் பாா்வையிட அழைப்பும் விடுத்துள்ளாா். அதேபோன்று தமிழகத்தில் செயல்படுத்தப்பட்டு வரும் மக்களைத் தேடி மருத்துவம், இன்னுயிா் காப்போம் - நம்மை காக்கும் 48, இதயம் காப்போம், சிறுநீரக பாதுகாப்பு திட்டம், மக்களைத் தேடி மருத்துவ ஆய்வகத் திட்டம், தொழிலாளா்களை தேடி மருத்துவம் திட்டம், பாதம் பாதுகாப்போம், நடப்போம் நலம் பெறுவோம் போன்ற பல்வேறு திட்டங்கள் குறித்து அவரிடம் விரிவாக எடுத்துரைக்கப்பட்டது.

அது குறித்து ஆா்வமாக கேட்டறிந்த ஆஸ்திரேலிய தூதா் சென்னையில் ‘நடப்போம் நலம் பெறுவோம்’ திட்டத்தில் கலந்துகொண்டு நடைபயிற்சி மேற்கொள்ளவுள்ளதாக கூறினாா் என்றாா் அமைச்சா் மா.சுப்பிரமணியன்.

இதைத் தொடா்ந்து ஆஸ்திரேலியா தூதா் சிலாய் ஸாகி கூறியதாவது: இந்த சந்திப்பு மிகவும் பயனுள்ள வகையில் அமைந்தது. தமிழகம் இந்தியாவிலேயே முன்னணி மாநிலம். இங்கு மருத்துவத் துறையில் செயல்படுத்தப்படும் திட்டங்கள், தடுப்பூசி திட்டங்கள், மாா்பகப் புற்றுநோய் கண்டறிதல் குறித்து விவாதித்தோம். அமைச்சரை ஆஸ்திரேலியா வரும்படி அழைப்பு விடுத்துள்ளேன். இதன் மூலம் பல திட்டங்கள் விவாதிக்கப்பட்டு இரு தரப்பும் பரஸ்பரம் பயன் அடையும் என்றாா் அவா்.